Հայաստանի Հանրապետությունն օտարերկրացի աշխատանքային միգրանտներին պետք է ապահովի հայերենի ուսուցման դասընթացներով, որովհետև եթե այդ մարդիկ որոշել են մեր երկրում ապրել, անպայման պետք է փորձեն մեր լեզուն սովորել, Azg.am-ի թղթակցի հետ զրույցում համոզմունք հայտնեց կրթության փորձագետ Սերոբ Խաչատրյանը։
«Պարզապես այստեղ խնդիրն այն է, որ մենք գործ ունենք Հայաստան ժամանակավորապես տեղափոխված, պատերազմից փախած մարդկանց հետ։ Նրանք, գուցե, իրենց ապագան Հայաստանում չեն տեսնում։ Իհարկե, նրանց փոքր մասը գուցե մնա, բայց հասկանալի է, որ մեծ մասն այստեղ ժամանակավոր են։
Դրա համար էլ հասկանալի է, որ հատկապես ռուս միգրանտները չեն ցանկանում հայերեն սովորել՝ նաև այն պատճառով, որ հայերը մեծամասամբ կարողանում են տարրական մակարդակի ռուսերենով շփվել։ Սա այն դեպքը չէ, երբ հայը գնում է Ամերիկա, Ռուսաստան կամ Ֆրանսիա՝ մշտական բնակվելու»,- ասաց մեր զրուցակիցը։
Սերոբ Խաչատրյանի համոզմամբ՝ մեծ թվով միգրանտների ներթափանցման ֆոնին փոքր ազգերը խնդիր ունեն ամեն կերպ պաշտպանելու իրենց լեզուն։
«Ճիշտ կլինի, որ մենք Հայաստանում հաստատված օտարերկրացիներին առաջարկենք հայերենի դասընթացներ։ Պետք է ժամանակ անցնի, որ տվյալ մարդը հայերեն սովորի, բայց որ պետք է պարտադիր սովորի, կարծում եմ՝ դա շատ տրամաբանական է։ Անհրաժեշտ է անել ամեն բան, որպեսզսի աշխատանքային միգրանտը հաղորդակցման բազային բառապաշար ունենա։ Եթե օտարերկրացին իրեն տեսնում է մեր երկրում, ապա պարտադիր պետք է սովորի մեր լեզուն։
Ես էլ, եթե որոշեմ գնալ Չինաստան և այնտեղ ապրել, պարտավորված կլինեմ չինարեն սովորել, որպեսզի ավելի լավ աշխատանք ունենամ և ինձ ավելի անկաշկանդ զգամ»,- ամփոփեց կրթության փորձագետը։
