Ադրբեջանի հետ խաղաղության պայմանագիրը չի կարող ստորագրվել ներկայիս տեսքով։ Այս մասին այսօր՝ նախընտրական քարոզարշավի առաջին օրը, Երասխում հայտարարեց «Լուսավոր Հայաստան» կուսակցության առաջնորդ Էդմոն Մարուքյանը։
Նա շեշտեց՝ Ադրբեջանը մինչ օրս չի ճանաչել Հայաստանի տարածքային ամբողջականությունը՝ քառակուսի կիլոմետրերով և քարտեզով, և խաղաղության պայմանագրին անպայման պետք է կցվի ՀՀ այն քարտեզը, որով Ադրբեջանը մեզ ճանաչում է։
«Մեր իշխանությունները մեզ բոլորիս խաբում են, որ իբր թե փոխադարձ իրար ճանաչում ենք՝ համաձայն Ալմա-Աթայի հռչակագրով։ Բայց դա քարտեզ չի, Ալմա-Աթայի հռչակագիրը որոշակի սկզբունքներ է հռչակում, որոնց տակ պետք է լիներ քարտեզ։ Այդ քարտեզը չկա։ Մինչև այդ քարտեզը չլինի, ոչ ոք իրավունք չունի ստորագրել այդ փաստաթուղթը», – շեշտեց Մարուքյանը՝ հավելելով՝ եթե Հայաստանը ճանաչում է Ադրբեջանը՝ քարտեզով, Ադրբեջանը փոխադարձաբար պետք է ճանաչի ՀՀ ինքնիշխան տարածքը՝ կրկին քարտեզով։
Պատասխանելով Թուրքիայի հետ հարաբերությունների մասին հարցին՝ Մարուքյանը հիշեցրեց՝ հայ-թուրքական սահմանը փակել է Անկարան, և հենց նա էլ պետք է բացի։ Նա շեշտեց՝ իր ղեկավարած կուսակցությունը չի պատրաստվում սահմանը բացելու համար որրևէ քայլ անել, իսկ երբ սահմանը բացվի, «Լուսավոր Հայաստանը» պատրաստ է սահմանը շահագործել։
Միևնույն ժամանակ, Մարուքյանը միաժամանակ տեղեկացրեց, որ կուսակցությունը խորհրդարան կներկայացնի նախագծերի փաթեթներ, որոնք կոչված են պաշտպանելու երկրի տնտեսությունը, ՀՀ կադաստրային օրենսդրությունը։
Մարուքյանը շեշտեց՝ Ադրբեջանի կողմից Լեռնային Ղարաբաղի օկուպացիայից հետո Նիկոլ Փաշինյանին առաջարկել է ստեղծել փախստականների նախարարություն, ինչին վերջինս չի համաձայնել, և դա Մարուքյանի ու Փաշինյանի վերջին հանդիպումն է եղել։
Նրա խոսքով՝ նման նախարարության ստեղծումը թույլ կտար լուծել Արցախի 150 հազար փախստականների մեծ մասի խնդիրները, սակայն իշխանությունները նախընտրել են նվազեցնել այդ խնդիրների կարևորությունը։
«Լեռնային Ղարաբաղի ժողովրդի վերադարձի անքակտելի իրավունքը միջազգային հանրության կողմից ճանաչված է», – ասաց Մարուքյանը։
