Արդարադատության նորանշանակ նախարար Կարեն Անդրեասյանն այսօր Կառավարության նիստից հետո՝ ճեպազրույցի ժամանակ, ասել է, որ Ռուստամ Բադասյանն իրեն թողել է մեծ, օրենսդրական, կառուցողական ժառանգություն, որի վրա հենվելով՝ ինքը կարող է բավարարել հասարակության որոշակի ակնկալիքները:
Առաջիկայում նախարարը ԲԴԽ-ի, ՔԿ-ի, Դատախազության և այլ մարմինների հետ հանդիպումներ է նախատեսել: Դատաիրավական բարեփոխումները նա մտադիր է իրականացնել ոլորտի ներկայացուցիչների հետ քննարկումների միջոցով:
Նախարարի ուշադրությունն են հրավիրել լուսանկարչուհի Լիլիան Գալստյանի մուտքն ԱԺ արգելելու փաստի վրա: Այդ առնչությամբ Անդրեասյանն ասել է.
«Լիլիան Գալստյանին անձամբ ե ճանաչում և ցավում եմ նրա հետ կատարվածի համար: Նույնիսկ ամենապրոֆեսիոնալ լրագրողը, եթե կարգ է խախտում, պետք է ենթարկվի պատասխանատվության: Խոսքի ազատությունը բացարձակ արժեք չէ, և եթե անվտանգության մարմինները գտել են որոշակի ռիսկեր, մենք պետք է դա հարգենք: Դա մեր պետության պաշտպանության հարցն է: Ազատ տեղաշարժի դեպքում կարող են լինել վարձկաններ, որոնք կարող են թաքնված լինել լրագրողի կերպարի տակ, ուրեմն պետք է հավատալ անվտանգության աշխատակիցներին»:
