Մեկ ամիս դուք ականատես եւ ունկնդիր էիք անհավանական խոստումների, ձեր ինտերնետ ու մեդիա բացվածքում լսում ու տեսնում էիք բոլոր այն մարդկանց, որոնք հավակնում են ղեկավարել ձեզ, նրանց խոսքում, դեմքի արտահայտություններում, շարժումներում ամեն օր մի չափաբաժին ավելի էիք բացահայտում նրանց անկեղծության ու կեղծության, ազնվության եւ անազնվության, կարողականության ու ապաշնորհության, ճշմարտացիության կամ խաբեության աստիճանը: Նրանք էլ սկզբում արհեստավարժ ու միգուցե ավելի անկեղծ էին համոզում ձեզ` իրական շարժառիթները բացահայտելով կամ միգուցե ծածկելով, հետագայում հոգնածության պատճառով ավելի անվարժ կատարելով իրենց դերերը, այդպիսով ամսվա վերջում ավելի մոտենալով-նույնանալով իրենց բուն կերպարին ու դերին, ձեզ նույնպես հնարավորություն տալով ամբողջացնելու նրանց կերպարի մասին ձեր պատկերացումները: Վերջին` եզրափակիչ հեռուստաբանավեճն ավելի քողազերծեց շատերին, քողազերծեց այն, որ քաղաքական կոմպոնենտը մեծ մասամբ բացակա է մեր քաղաքական ուժերի հիմնական օրակարգից` նրանք սեփական սուբյեկտիվ, անձնական եւ խմբային մոտիվներով կամ այս կամ այն ճնշման ներքո են քաղաքականության մեջ, իսկ որպես վարչապետի թեկնածու գեթ մեկ կին գործչի բացակայությունն ուղղակի մեր կարծրատիպային նկարագրի վկայությունն է:
Եւ ես, հիրավի, հասկանում եմ, որ ձեր տարբեր շերտեր նախընտրական քարոզչության թատրոնի այս մեկ ամսվա ընթացքում հոգնել են, հիասթափվել են, բարկացել են, հուսահատվել կամ միգուցե, ընդհակառակն, հույսով են լցվել:
Հասկանում եմ նաեւ ուրիշ մի քանի բան.
-Որ ձեր մի զգալի շերտ ավելի ինտելեկտուալ է, ուսյալ ու կրթված, քան ընտրարշավին մասնակցող ուժերի ներկայացուցիչները, ու նրանք կհարցնեն, թե ոնց կարող են իջնել իրենց ինտելեկտի բարձունքից ու ընտրել այդպիսիներին.
-Որ ձեր մեջ կան շատ ավելի ազնիվները, քան ընտրությունների բազմապատիկ խաբեություններով, իշխանությամբ տրված «ընտրյալության» գայթակղություններով անցածների «ազնվությունն» է.
-Որ ձեր մեջ կան գիտելիքի ու պրոֆեսիոնալիզմի իսկական կրողներ, ի տարբերություն տարբեր ժամանակներոմ իշխանության մեջ տարբեր գործոնների շնորհիվ հայտնված բախտախնդիրների ու տարբեր ժամանակներում իրենց վստահված ոլորտները վարի տվածների.
-Որ սովորական հայերի մեջ շատուշատ շերտեր կան` բարոյականության, առաքինության, երկրի զգացողության գերադաս հատկանիշներով, որոնցով երբեմն չեն փայլում նրանք, որոնք ուզում են այդ շերտերի կառավարողը լինել.
Ու այդ պատճառով ես ինձ թույլ չեմ տա խորհուրդ տալ` ում ընտրել:
Ես միայն կարող եմ մի քանի պայման նշել, որոնք հարկավոր կլինեն ընտրության օրը, եթե անկախ վերը թվարկածից, անկախ արժանի-անարժան այսօրվա հակադրությունից` պետք է մոտիվացնեն մեզ, եւ եթե սիրում ենք մեր երկիրը, եթե մտածում ենք, որ անկախ մեզ պարտադրվող մոդելներից ու սխեմաներից, մեր գլխին այս մեկ ամիսը կոտրված աննախադեպ քանակի տեխնոլոգիաներից` մենք պետք է այնուամենայնիվ ուժ գտնենք մեր մեջ ընտրության գնալու եւ մեր բաժին սրբագրումներով գոնե փորձելու կոտրել մեզ պարտադրվող սխեմաները.
Եւ ուրեմն` կարող եմ միայն հուշել, թե ինչ չպե’տք է անել.
-Ընտրության չգնալ հանուն անձնական շահի, քեշ փողի, հանուն ազգականին կամ հիմնարկի ղեկավարին տված խոստման. հիշեք` փողի, շահի դիմաց ընտրությամբ դուք վտանգում եք այն ապագան, որի մեջ ձեր երեխաներն են ապրելու, կտրում եք այն ծառը, որի վրա նստած եք: Ուղղակի վռնդեք ձեզ փող առաջարկողներին, դուռը ծեփեք նրանց երեսին: Ամենաահավոր սխալը, որ կարող եք թույլ տալ ձեր ու մնացած ժողովրդի ապագայի առումով` մի երեք օր սոցիալական խնդիր լուծելու դիմաց մեր բոլորի ապագա տարիները վտանգելն է:
-Եթե դեռ չեք կողմնորոշվել եւ ձեր տրամադրությունը կառուցում եք այս կամ այն գործչի կամ լրատվամիջոցի պերճախոսության վրա, ապա չսխալվելու համար պարզ գործողություն արեք` ընդամենը պարզեք, թե ում կողմից է ֆինանսավորվում տվյալ գործիչը կամ լրատվամիջոցը, ու ձեր համար կպարզեք ձեզ առաջարկվող խաբեության կամ ողջամտության աստիճանը: Մանավանդ` ամեն ոք այսօր հնարավորություն ունի համացանցային եթերում ձեզ մոլորեցնելու:
-Երբեք մի ասեք, թե ում եք ընտրելու, եթե դա ձեզ պարտադրում են, ձեր սահմանադրական իրավունքն է` ձեր մտադրությունները թողնել քվեատուփում միայն:
-Եւ միշտ հիշեք, դուք մասնակցում եք երկրի մոտակա տարիների պատկերի հավաքմանը, արեք այնպես, որ հետո չդժգոհեք ու չասեք` ես մեղավոր չեմ…
ՄԱՐԻԵՏԱ ԽԱՉԱՏՐՅԱՆ
Հեղինակի յութուբյան հրապարակումներին հետեւեք հետեւյալ հղումով.
