«Եթե հաղթանակ տանեինք, կսկսեինք իրար գովել, լավը ներկյացնել, բայց մեր արածը պատերազմի պարտության հետ խամրեց, մենք էլ պարտվեցինք իշխանությունների հետ միասին… Մեր հյուրանոցում մարդիկ մոտ վաթսուն օր մնացին, այդ բոլոր օրերի օգտագործած գազի համար վճարեց պետությունը»- Azgonline.am-ի հետ զրույցում ասաց Գորիսի հյուրանոցային ոլորտի ներկայացուցիչ Ժորա Ալեքսանյանը:
Նրա փոխանցմամբ` տեղի հյուրանոցային ոլորտհ պատերազմից հետո պարտքեր շատ ունի, վերանորոգման կարիք ունի, դիմել են կառավարությանը, բայց հույս չունեն: Նույնիսկ այցելուների հոսքն է նվազել, կապված սահմանային իրավիճակի հետ, որն էլ իր հերթին ավելի է խորացնում պարտքերը.
«Մի տասը-տասնհինգ հոգի օրերս Երևանից պիտի գային մեզ մոտ հանգստանալու, բայց լսելով , որ Որոտանում թուրքերը խրամատներ են քանդել , չեկան: Հիմա որտե՞ղ խրամատներ չկան, Երևանում խրամատը ուրիշ ձև են ընկալում, Գորիսում ուրիշ ձև: Թուրքը վախից է խրամատ քանդում, մենք անհանգստանալու բան չունենք: Լրատվական միջոցների տարածած թե կեղծ, թե ճիշտ լուրերը իհարկե իրենց ազդեցությունը թողնում են, մարդիկ մտածում են խրամատի տեղը թնդանոթ է դրած ու չեն գալիս: Այս անտերությունը հիասթափեցնող ու հուսահատեցնող է: Ժողովուրդը հիասթափված է, զզված է, կարևոր չի ումից: Թուրքից այստեղ վախեցող չկա, ոչ մեկը այստեղ թուրքից չի վախենում, բայց վիճելի շատ հարցեր կան սահմանների հետ կապված, բայց անտերություն է, կառավարությունից մարդ չկա: Թուրքի գեներալը գալիս մեր չոբանի հետ սահման է որոշում, Անդրանիկ Քոչարյանը ասում էդա մեր գործը չի, դա ԱԱԾ-ի գործն է: Ես հարյուր նման հարց ունեմ իրենց տալու: Թուրքի մասին մենք չենք մտածում, թուրքն ո՞վ է որ, բայց որ անտեր ենք, դա փաստ է»-բացատրում է Ալեքսանյանը:
Նա նաև անդրադարձավ ՓաշինյանիՍյունիքում ունեցած խնդիրներին. «Ինձ հարցրին, թե ինչու է քաղաքապետը կազմակերպում , որ Փաշինյանը Գորիս չմտնի. բացատրում եմ, որ Գորիսում երբեք թուրք չի եղել, չի ապրել, և քաղաքապետը գորիսցիների առաջ պատասխանատվություն ունի, նրանց պատասխան է տալու: Գորիսի հոգսերը քաղաքի հոգսերի նման չեն: Եթե նորմալ պետություն է, իրականությունը պիտի իմանա, Գորիսը պատերազմի ընթացքում ինչ կարողացել և ինչքան կարողացել արել է, և շնորհակալության փոխարեն որոշ լրատվամիջոցներ մեզ կերան, մորթեցին, իշխանություններն էլ փորձեցին մեր քաղաքապետին բանտարկել, ինչ է ճիշտն է խոսել: Մեր քաղաքապետը չէր կարող չխոսել, ժողովուրդը կմորթեր իրեն: Այստեղի ժողովուրդը առանձնահատուկ է, թե’ ծառայելու, և թե’ հայրենիքը պաշտպանելու առումով»:
«Հկ-ի միջոցով դիմել ենք Էկոնոմիկայի նախարարություն: Մոտ 400 մլն վարկ ունենք հյուրանոցներով վերցրած, սկսվեց համաճարակը, հետո պատերազմը: Վարկերը փակել չենք կարողանում: Գորիսում հյուրանոցային մոտ երկու հազար տեղ կա, բայց պատերազմի ժամանակ Գորիսի ամբողջ ժողովուրդը Արցախից մոտ չորս- հինգ հազար հոգի մարդ է ընդունել: Հիմա հուսով ենք , որ դարձայալ հյուրանոցները կսկսեն աշխատել, և եկողներ կլինեն: Կարծես թե իշխանությունները իրենց սուտ լուրերով ամեն ինչ անում են, որ հանգստացողները չգան»- հույս է հայտնում մեր բանախոսը:
