Պետրոս Տեր-Մաթոսյանի նոր հատորը
Մեծ Եղեռնի 108-րդ տարելիցի առթիվ, Նեբրասկա համալսարանի հրատարակչությունը (UNP) տեղեկացնում է, որ լույս է ընծայել Նեբրասկա-Լինկոլն համալսարանի (UNL) պատմության ֆակուլտետի Միջին Արեւելքի արդի պատմության ամբիոնի վարիչի տեղակալ, Հրեական ուսումնասիրությունների Հայմեն Ռոզենբերգի անվան պրոֆ. Պետրոս Տեր-Մաթոսյանի խմբագրած «Ցեղասպանությունների ժխտումը 21-րդ դարում» (Denial of Genocide in the Twenty-First Century) վերնագրով նոր հատորը, որն առաջին անգամ ժխտման անցյալի եւ արդի ժամանակների ցեղասպանությունների ամենավայրագ մեթոդները քննարկում է համեմատական, միջէթնիկական տեսանկյունից:
Պատմության ընթացքում կատարված բոլոր ցեղասպանություններն էլ ժխտվել են այս կամ այն պետության կամ ոչ-պետական դերակատարների, շատ անգամ՝ այսպես կոչված «արհեստավարժ» կամ կեղծ պատմաբանների կողմից: 21-րդ դարում ժխտումը հին մեթոդներին գումարել է նաեւ նոր մարտավարություններ, որոնց թվում են քանակի (թվերի) եւ իրավական սահմանումների վերաբերյալ վիճարկումները, զոհին մեղադրելը, ռազմատենչ սպառնալիքները եւ ապատեղեկատվության տարածումը: Բռնատիրական կառավարությունների եւ քաղաքական կուսակցությունների կողմից սոցցանցերի միջոցով ապատեղեկատվությունը դարձել է առօրյա կյանքի անբաժանելի մասը: Ներկա հատորը ի մի է բերում տարբեր մշակույթների տեր ցեղասպանագետների մի ամբողջ հույլ, որոնք քննարկում են հայոց Մեծ Եղեռնը, Հոլոքոսթը, ինչպես նաեւ Բոսնիայի, Կամբոջիայի, Ռուանդայի, Սիրիայի եւ Գուատեմալայի ցեղասպանությունները:
Հատորում Մաթոսյանի առաջաբանից բացի գրություններ ունեն Robert K. Hitchcock-ը (Ամերիկացի բնիկ հնդկացիների բնաջնջման մասին), Talin Suciyan-ը (Գերազանցության գործոնը Հայոց ցեղասպանության մեջ), Nare A. Mamigonian-ը (Հայոց ցեղասպանության ժխտումը եւ ամերիկյան դատարանները), Eldad Ben Aharon-ը (Հայոց ցեղասպանության բանաձեւը 2009-2021 թվերի Նաթանյահուի իշխանության ժամանակ), Gerald J. Steinacher-ը (Շոայի ժխտումը 21-րդ դարում), Ben Kiernan-ը (Խուսափում Խմեր Ռուժի ցեղասպանությունը ճանաչելուց), Samuel Totten-ը (Գուատեմալայի ցեղասպանության ժխտումը, 1981-2020 թթ.), Jelena Suboterc-ը (Բոսնիայի ցեղասպանության ժխտումը), Roland Moerland-ը (Թութսիների ցեղասպանության ժխտումը), Uğur Ümit Üngör-ը եւ Annsar Shahhoud-ը (Պատմողական առճակատում: Ասադի վարչակազմի ժխտումները) եւ Israel W. Charni-ն (Վերջաբան: Իրականության ժխտումները):
Պետրոս Տեր-Մաթոսյանը նախկինում եղել է Հայագիտական Ուսումնասիրությունների ընկերության (SAS) նախագահը: Հեղինակ, համահեղինակ եւ խմբագիր է վեց հատորների, որոնցից վերջինը Ստենֆորդ համալսարանի հրատարակչատան 2022-ին լույս ընծայած «Ադանայի սարսափները» գիրքն է:
Պատրաստեց` ՀԱԿՈԲ ԾՈՒԼԻԿՅԱՆԸ
(The Armenian Mirror-Spectator)
