Տորոնտոյի համալսարանի հրատարակչատունը 5-րդ անգամ վերահրատարակել է «Centuries of Genocide: Critical Essays and Eyewitness Accounts» (Ցեղասպանության դարեր: Քննադատական էսսեներ եւ ականատեսների վկայություններ) խորագրով գիրքը, որն արդեն 30 տարի է, ինչ օգտագործվում է որպես դասագիրք քոլեջներում ցեղասպանությունների իրազեկման եւ մարդու իրավունքների պաշտպանության դասընթացներում:
Ամբողջովին վերանայված եւ նոր նյութերով հարստացված հատորը խմբագրել է Ֆայեթվիլում գտնվող Արկանզաս համալսարանի կրթության վաստակավոր գործիչ պրոֆ. Սամուել Տոտտենը: Գրքի 15 գլուխները պատմում են Ուկրաինայում Ռուսաստանի կողմից ստեղծված արհեստական սովի, Կալիֆոռնիայում Յանա հնդկացիների, Հոլոքոսթի, Կամբոջայի, իրաքյան Քուրդիստանի, Ռուանդայի, Դարֆուրի եւ Հայոց ցեղասպանությունների մասին: Տոտտենը բացի առաջաբանից, գրել է նաեւ ISIS-ի կողմից եզդիների բնաջնջման մասին: ANI հայկական ազգային ինստիտուտի տնօրեն դոկտ. Ռուբեն Ադալյանը հեղինակել է Հայոց ցեղասպանությանը նվիրված գլուխը, որը բոլոր նախորդ հրատարակություններում ընդգրկված է եղել, բայց այս անգամ վերանայվել է եւ լրացվել չորս նոր ականատեսների` Հելեն Թաթարյանի, Սարգիս Աբոճյանի, Թագուհի Լեւոնյանի եւ Յեվնիկ Ադրունու վկայություններով: Գիրքը առաջին անգամ Ուիլյամ Պարսոնսի, Իսրայել Չառնիի եւ Սամուել Տոտտենի խմբագրությամբ լույս է տեսել Ռութլեջ հրատարակչատան կողմից: Ներկա վերահրատարակմանը իրենց գրություններով մասնակցել են Բենջամին Մեդլին, Նաթաշա Զարեցկին, Սյուզան Ջոնասը, Ջերալդ Կապլանը, Քրեգ Էչեսոնը եւ ուրիշներ:
Պատրաստեց` ՀԱԿՈԲ ԾՈՒԼԻԿՅԱՆԸ
(The Armenian Mirror-Spectator)
