Հայաստանի Թեքեյան մշակութային միությունը կազմակերպել էր ականավոր պետական գործիչ, գիտնական, ՀԹՄՄ «Ադամանդակուռ Արարատ» շքանշանակիր Ֆադեյ Սարգսյանի 100-ամյակին նվիրված երեկո:
Գերաշնորհ Տեր Նաթան արքեպիսկոպոս Հովհաննիսյանը փոխանցեց Ամենայն Հայոց Կաթողիկոս Գարեգին Բ-ի հայրապետական օրհնությունն ու ողջույնի խոսքը՝ ի նշան Առաքելական Սուրբ եկեղեցու արժանավոր զավակի գնահատաաարժան վաստակի:
Սրբազան հայրն իր խոսքում ընդգծեց Ֆադեյ Սարգսյանի՝ խոնարհ ու անկեղծ նկարագրով հայորդու երկարամյա գործունեությունը հայրենական, գիտական եւ հոգեւոր կյանքում. «Նա իր պապից՝ Տեր Թադեոս քահանայից, ժառանգել էր սուրբ եկեղեցու եւ ազգային հոգեւոր արժեքների հանդեպ մեծ սեր: Իր ստանձնած պատասխանատու պաշտոններում, ի հեճուկս ժամանակի հակառակաթեիստական հասարակարգի՝ եկեղեցու հանդեպ որդեգրած քաղաքականությանը, նա իր հոգու պարտքն էր համարում առանձնահատուկ հոգածությամբ օժանդակել սուրբ եկեղեցու առաքելության իրագործմանը»,- նշեց Տեր Նաթան արքեպիսկոպոս Հովհաննիսյանն ու հավաստիացրեց, որ Մայր Աթոռ Սուրբ Էջմիածնում շատ բարձր են գնահատում նաեւ Ֆադեյ Սարգսյանի՝ Մայր եկեղեցու նվիրյալ զավակի հայրենանվեր, եկեղեցասեր ու ազգաշահ գործունեությունը:
Գեներալ-մայոր, ԽՍՀՄ պետական մրցանակի կրկնակի դափնեկիր, տեխնիկական գիտությունների դոկտոր, ՀՀ Գիտությունների ազգային ակադեմիայի ակադեմիկոս, մի շարք երկրների գիտությունների ակադեմիաների անդամ Ֆադեյ Սարգսյանի գործունեությանը հուշ-երեկոյի ընթացքում անդրադարձավ նաեւ Հայաստանի Թեքեյան մշակութային միության նախագահ Ռուբեն Միրզախանյանը:
«Արդյո՞ք չենք ապրում մեր պատմության ամենաողբերգական օրերը, երբ պատշաճ գնահատական չենք տալիս պատմությանը, չենք գնահատում ազգի մեծերին: «Ձնհալի» ժամանակաշրջանի մասին խոսելիս անդրադառնում ենք միայն մշակույթի ոլորտին, սակայն «ձնհալն» սկսվեց տնտեսության եւ գիտության մեջ արմատական փոփոխություններով. ժամանակի մարդիկ, այդ թվում նաեւ Ֆադեյ Սարգսյանը, տաղանդներ էին»,- իր խոսքում նշեց Ռուբեն Միրզախանյանն ու փաստերով, տվյալներով անդրադարձավ Ֆադեյ Սարգսյանի գործունեությանը՝ հանուն Հայաստանի պետական շահի, գիտության զարգացման, հայրենիքի բարօրության:
Պրոֆեսոր Միրզախանյանը նկատում է՝ թեեւ մի շարք հանգամանքներով պայմանավորված Ֆադեյ Սարգսյանի գործունեության վերաբերյալ կարեւոր դրվագներ չեն ասվում եւ չեն գրվում, սակայն նրա գործունեությունը համակ նվիրում էր պետությանը. բացառիկ կամային էր եւ հայրենասեր: Նա հիշեց եւ հիշեցրեց ժամանակաշրջանը, երբ ամեն տարի բացվում էր 70-80 միջնակարգ դպրոց, իսկ գիտական կենտրոնների թիվը տասնապատկվում էր. դրանում մեծ էր Ֆադեյ Սարգսյանի դերը:
Ֆադեյ Սարգսյանին էր վիճակված հիրավի մի ամբողջ պետության գործառույթ իրականացնել: Նրա բարձր հեղինակությունը շատ փակ դռներ է բացել, շատ կարծր սրտեր մեղմացրել: Նա գնահատված գործիչ էր նաեւ հոգեւոր դասի համար, արժանացել է «Սուրբ Սահակ-Սուրբ Մեսրոպ» շքանշանի:
Ֆադեյ Սարգսյանի հոբելյանին ներկայացված էին նաեւ նրա հոդվածների եւ հուշերի ժողովածուները, որոնք ընթերցելու եւ վերընթերցելու հնարավորություն ունեցան երեկոյի մասնակիցները:
Երեկոյի ընթացքում Ֆադեյ Սարգսյանի՝ ականավոր պետական գործչի, գիտնականի մասին իրենց խոսքն հղեցին նաեւ «ՍԻՆՈՓՍԻՍ ԱՐՄԵՆԻԱ» ընկերության տնօրեն, Հայաստանի Ֆիլատելիստների միության նախագահ Հովիկ Մուսայելյանը, ՀՀ ԳԱԱ իսկական անդամներ Էդուարդ Ղազարյանն ու Սամվել Շուքուրյանը:
Դավիթ Դովլաթյանի դիզայնով Ֆրանսիական «Քարթր» տպագրատանը Ֆադեյ Սարգսյանի 100-ամյակին նվիրված նամականիշեր են թողարկվել՝ տասը հազար օրինակով: Նամակնիշերը փոխանցվեցին Ֆադեյ Սարգսյանի թոռանը:
Տարին կարող էր լինել Ֆադեյ Սարգսյանական, կարող էին միջազգային գիտաժողովներ, մեծարման հուշ-երեկոներ կազմակերպվել պետական մակարդակով: Թեքեյան մշակութային միությունն այդ բացը լրացնելու, նաեւ իր կողմից արժանին մատուցելու համար էր իր հարկի տակ համախմբել ազգային կուռ մտածողությամբ ու պետական շահի գիտակցմամբ մարդկանց, որոնց համար Ֆադեյ Սարգսյանը եղել ու միշտ մնալու է Հայաստանի Հանրապետության կայացման գործում մեծ ավանդ ունեցող գործիչ:
Ցավոք, մեզանում արմատներ է գցել ազգի նվիրյալներին, պետության կայացման գործում մեծ ներդրում ունեցող գործիչներին մոռանալու, անտեսելու արատավոր վարքագիծը:
ՔՐԻՍՏԻՆԵ ՄԵԼՔՈՆՅԱՆ
ՀԹՄՄ լրատվական կենտրոն
