Օգոստոսի վերջին Սեուլի (Հարավային Կորեա) Վավերագրական կինոյի միջազգային կինոփառատոնի մրցույթային ծրագրում ընդգրկված է եղել նաեւ Հակոբ Մելքոնյանի «Պատերազմի օրագիր» ֆիլմը (2023, Հայաստան-Ֆրանսիա):
Սեպտեմբերի 17-ին Սեուլի արվեստի կենտրոնի համերգասրահում կայացել է Ազգային սիմֆոնիկ նվագախմբի 244-րդ հերթական համերգը ուկրաինուհի դիրիժոր Օքսանա Լինիվի ղեկավարությամբ: Համերգին կատարվել է նաեւ Արամ Խաչատրյանի ջութակի կոնցերտը Սերգեյ Խաչատրյանի կատարմամբ: Ինչպես http://www.womennews.co.kr կայքէջում գրել է լրագրող Լի Սե-ահը, Խաչատրյանի ստեղծագործությունը 20-րդ դարի Ռուսաստանը ներկայացնող ջութակի կոնցերտ է: Այն օգտագործում է կոմպոզիտորի հայրենի Հայաստանի ժողովրդական երաժշտությունը եւ յուրահատուկ ստեղծագործություն է, որը համատեղում է հումորային եւ տխուր մթնոլորտը: Ի տարբերություն ժամանակի մթնոլորտի, երբ տարածված էին ատոնալ ավանգարդ ստեղծագործությունները, զգացվում է Խաչատրյանի յուրահատկությունը: Իսկ Սերգեյ Խաչատրյանի մասին գրվել է, որ նա համաշխարհային ճանաչում ունեցող ջութակահար է Հայաստանից, որը 2000 թվականին եղել է Յան Սիբելիուսի անվան ջութակահարների 8-րդ միջազգային մրցույթի ամենաերիտասարդ հաղթողը, իսկ 2005 թվականին Եղիսաբեթ թագուհու մրցույթում գրավել է առաջին տեղը՝ կատարելով իր դեբյուտը միջազգային բեմում:
Ավելացնենք նաեւ, որ սեպտեմբերի 18-ից Սեուլում Ռախմանինովի ծննդյան 150-ամյակի առթիվ համերգներով հանդես է եկել երիտասարդ դաշնակահար, մի շարք հանրապետական և միջազգային մրցույթների դափնեկիր Ժորա Սարգսյանը:
Ա. Բ.
