Հայաստան-Իրան էլեկտրահաղորդման 400 կՎ լարման երրորդ գիծը կունենա ժամում 1200 ՄՎտ հզորություն: Այժմ այն գտնվում է ավարտական փուլում: 85 տոկոսն արդեն կառուցվել է: Կլինի 280 կմ գիծ Հրազդանից դեպի Իրանի սահման եւ եւս 400 կՎ ենթակայան Սյունիքի մարզում: Եվ եւս մեկ գիծ կլինի դեպի Վրաստանի սահման: Նախագծի ավարտից հետո հնարավորություն կլինի միացնել չորս երկրները՝ Իրանը, Հայաստանը, Վրաստանը եւ Ռուսաստանը նույն համակարգում: Անհրաժեշտ է նշել, որ Հայաստան-Իրան էլեկտրահաղորդման երրորդ գիծը շահավետ կլինի ամբողջ ԵԱՏՄ-ի տարածքի համար:
Վերջին երկու ամսվա ընթացքում Հայաստանից՝ Իրան հատվածում տեղադրվել է մոտ 40 հենասյուն, կատարվել են բետոնացման աշխատանքները, որոնք իրականացվում են բարդ ռելիեֆային պայմաններում: Ձեռք է բերվել պայմանավորվածություն ամրապնդելու համագործակցությունը իրանական կողմի հետ՝ աշխատանքներն ավելի օպերատիվ կազմակերպելու ուղղությամբ:
220/110/6կՎ «Ագարակ-2» ենթակայանը կարեւոր նշանակություն ունի էլեկտրաէներգիայի հուսալիության բարձրացման համար:«Շինուհայր» ենթակայանից «Մեղրի-1» եւ «Մեղրի-2» էլեկտրահաղորդման գծերը միանում են «Ագարակ» ենթակայանին, որտեղից «Արասբարան-1» եւ «Արասբարան-2» էլեկտրահաղորդման գծերով էլեկտրաէներգիան մատակարարվում է Իրան: Մեկ ժամում ենթակայանը կարող է մինչեւ 300 ՄՎտ էլեկտրաէներգիա արտահանել Իրան: «Նորավան» ենթակայանի շահագործումից հետո հնարավոր կլինի այն ավելացնել եւս 200 ՄՎտ հզորությամբ եւ ժամում 500 ՄՎտ հզորությամբ էլեկտրաէներգիա արտահանել Իրան, իսկ Հայաստան-Իրան 3-րդ էլեկտրահաղորդման գծի կառուցման եւ «Հրազդան» հանգույցի «Դդմաշեն» կայանի շահագործման պարագայում՝ արտահանման հնարավորությունը կավելանա ժամում 500 ՄՎտ-ով, կազմելով 1000 ՄՎտ:
Շինուհայր ենթակայանը շահագործման է հանձնվել 1961թ: Շահագործումից հետո այնտեղ կատարվել են մասնակի վերակառուցման աշխատանքներ: Ենթակայանի հիմնանորոգման աշխատանքների մեկնարկը տրվել է 2018-2019թթ.: Ներկայումս աշխատանքները գտնվում են ավարտական փուլում:Ենթակայանի դրվածքային հզորությունը 251 ՄՎտ է: Տեղադրված են մեկ 125 եւ երկու 63 ՄՎտ հզորության նոր ավտոտրանսֆորմատորներ:Այն համակարգային նշանակության հանգուցային ենթակայան է:
ՍՏԵՓԱՆ ՊԱՊԻԿՅԱՆ
