Աշխարհաքաղաքական վեկտորի փոփոխություն
Հայաստանի աշխարհաքաղաքական վեկտորի փոփոխության դեպքում, ՀԱՊԿ-ից դեպի մեկ այլ անվտանգային համակարգ անցում կատարելուց բացի, ռազմավարական ու առեւտրատնտեսական գործընկերներին փոխելուց զատ, մեր կարծրացած աշխարհահայացքը վերանայելու հետ մեկտեղ, որոշակի փոփոխություններ ենք կատարելու նաեւ մեր կենցաղում եւ առօրյա խոսակցական լեզվի մեջ:
* Նման աշխարհացունց փոփոխություններից հետո, այլեւս չենք խոսելու ԼԱՐՍԻ փակ լինելու մասին, այլ քննարկելու ենք ՂԱՐՍԻ ճանապարհի խափանման քաղաքական մոտիվները:
* Մեզ մոտ արտասահմանցի տեսնելիս ոչ թե օրհնելու ենք ռուսի, այլ Նանսի Փելոսիի ու Սամանթա Փաուերի Հայաստան այցելելու սհաթը:
* Տարիքն առած օտարազգի կին տեսնելուց, Նատաշաներին մտաբերելով «ռուսի պառավը ո՞րն ա» թեւավոր խոսքն արտաբերելու փոխարեն հիշելու ենք երիտասարդության աստվածուհու՝ Ֆլորայի հետ հավիտենական դաշինք կնքած դերասանուհիներ Սոֆի Լորենին, Ջինա Լոլոբրիջիդային, Էլիզաբեթ Թեյլորին, Բրիջիտ Բարդոյի ու մյուսներին:
* Ռուսական բորշչի փոխարեն ուտելու ենք ուկրաինական բորշչը, ժարկոյի փոխարեն՝ գինու սոուսով պատրաստված ֆրանսիական սթեյքը, պելմեննիի փոխարեն՝ վրացական խինկալին, սիլյոտկայի փոխարեն՝ թուրքական շաուրման…
* Ռուսասկան արջ տեսնելուց հայերի մոտ առաջացող հոգեկան տագնապի փոխարեն ի հայտ է գալու վախի նոր տեսակ, այս անգամ արդեն՝ կարմիր հագուստից գազազող ցուլերի պատճառած վախի տեսքով:
* Ռուսական բաղնիքից անցումը դեպի թուրքական համամ լինելու է սահուն ու աննկատ:
* Երեք մատով կոմբինացիային փոխարինելու է գալու միջնամատը, իսկ ռուսական բիլիարդին՝ ամերիկյան գոլֆը:
* Հավատարիմ մնալով մեր դավանած արժեքներին ու սկզբունքներին, ի հեճուկս բոլորի, նիվայի փոխարեն սեւ յաշիկ ենք քշելու:
ԳՐԻԳՈՐ ԱՌԱՔԵԼՅԱՆ
