ՀՀ ԳԱԱ Ֆիզիկական հետազոտությունների ինստիտուտում մշակվել եւ իրականացվել է միկրոմասնիկների գերման սարքերի նոր եղանակ:Այն նախատեսված է ֆոտոռեֆրակտիվ բյուրեղի մակերեւույթին լազերային փնջով մակածված, ամիսներ պահպանվող ֆոտովոլտային դաշտերի միջոցով միկրո- նանոմասնիկների ղեկավարվող տեղաշարժման ու գերման համար:
Միկրո- նանոմասնիկների ղեկավարվող տեղաշարժման մեթոդների մշակումը կարեւոր նշանակություն ունի գիտության տարբեր ոլորտներում՝ ինտեգրալ օպտիկայից եւ ֆոտոնային սարքերից մինչեւ նանոէլեկտրոնիկա եւ կենսատեխնոլոգիա: Վերջին տասնամյակում զգալի զարգացում են ստացել լազերային տեխնիկայի աջակցությամբ միկրո- նանոմասնիկների իրականացվող գերման եւ տեղաշարժման մեթոդները:
Մշակվել է միկրոմասնիկների գերման սարքերի նոր եղանակ: ֆոտոռեֆրակտիվ բյուրեղի մակերեւույթին հատուկ դասի օպտիկական բեսելյան փնջով մակածվում են պարբերական բաշխվածությամբ ֆոտովոլտայիկ էլեկտրական դաշտեր, որոնք կարող են ազդել բյուրեղի մակերեւույթի մոտակայքում գտնվող միկրո- նանոմասնիկների վրա: Մշակված լավիտների յուրահատկությունն է բյուրեղի մակերեւույթին ձեւավորված դաշտերի երկար կյանքի տեւողությունը՝ մինչեւ մեկ տարի: Վերջերս մշակված լավիտները կիրառվել են նաեւ կենսաբանական օբյեկտների վրա, մասնավորապես՝ ԴՆԹ-ի մոլեկուլների գերման համար: ԴՆԹ-ի դիտարկումը իրականացվել է բեւեռացումային մանրադիտակի միջոցով:
Հետազոտությունները սկսվել են Միջազգային Գիտատեխնիկական Կենտրոնի դրամաշնորհի շրջանակներում, այնուհետեւ շարունակվել են ՀՀ ԳԱԱ Ֆիզիկական հետազոտությունների ինստիտուտի բազային ֆինանսավորման ծրագրի շրջանակում:
Աշխատանքը հետաքրքրություն է առաջացրել Կանադայի Քվեբեկ նահանգի Լավալի համալսարանում: 2023թ. ՀՀ ԳԱԱ Ֆիզիկական հետազոտությունների ինստիտուտի եւ Լավալի համալսարանի միջեւ ստորագրվել է համագործակցության պայմանագիր:
ՍՏԵՓԱՆ ՊԱՊԻԿՅԱՆ
