Դեկտեմբերի 8-ին Թորոնթոյում «Ստեղծագործական գործողությունների կոալիցիա» կազմակերպության ջանքերով տեղի է ունեցել Արցախի եւ Պաղեստինի համերաշխությանը նվիրված երեկո՝ «Լեզուն, սիմվոլիզմը եւ հակաոչնչացման անհանգստացնող ակտերը + Բարձր ստվերի գովասանքի մեջ» վերնագրով: Կազմակերպիչներն էին հայազգի արվեստագետներ Լարա Արաբյանը, Ջադի Դարաուին (Կանադա) եւ Ալիս Ստեփանյանը (ԱՄՆ): Միջոցառման ընթացքում ցուցադրվել են պաղեստինցի եւ հայ նկարիչների գործերը ներկայացնող մի քանի տեսանյութեր ու հայ եւ պաղեստինցի կինոբեմադրիչների ֆիլմեր, որոնց մեջ՝ Անահիտ Յահճյանի «Հիշե՛» եւ Արա Օշականի «Ի՞նչ կարող եմ ասել քեզ» գործերը: Կանադական թատրոնի դերասանուհի Լարա Արաբյանն ընթերցել է արցախցի բանաստեղծների գործեր՝ Դայանա Տեր-Հովհաննիսյանի անգլերեն թարգմանություններով՝ Յուրի Սահակյանի «Դիմանկարը» եւ «Պատերազմը», Հրաչյա Բեգլարյանի «Ղարաբաղը», նաեւ պաղեստինցի Նաջման Դարվիշի «Ո՞վ է հիշում հայերին» եւ ամերիկահայ Զավեն Օվյանի «Ես հիշում եմ նրանց՝ պաղեստինցիներին» բանաստեղծությունները: Իսկ արցախցի բանաստեղծ Վարդան Հակոբյանի «Ինքնադիմանկարի փորձը» կամավոր ընթերցել է Լարայի դեռահաս որդին՝ Սեւանը: Ներկաները ծանոթացել են նաեւ հայ եւ պաղեստինյան խոհանոցին եւ ծավալել քննարկում:
Ա. Բ.
