Կայացավ համահայկական մշակութային նոր հարթակի` www.armtmm.com շնորհանդեսը
Նորաստեղծ հարթակը Հայաստանի Թեքեյան մշակութային միության մշակութապահպան հերթական ծրագիրն է, որն ուղղված է հայրենիքում եւ նրա սահմաններից դուրս հայազգի արվեստագետների հանրահռչակմանը: Միությունը ներկայացնում է բացառապես հայկական մշակույթը, հայազգի նշանավոր արվեստագետներին եւ նրանց ստեղծագործությունները:
Կայքում՝ «Մշակութային ցուցասրահ» բաժնում ներկայացված են ժամանկակից հայ ստեղծագործողների աշխատանքները: Նրանք ՀՀ ժողովրդական նկարիչներ եւ վարպետներ են, որոնց աշխատանքները զարդարում են աշխարհի հայտնի ցուցասրահները եւ վաղուց հայտնի են աշխարհի մշակութային հանրությանը: Նկարներ, զարդեր, քանդակներ, երաժշտական գործիքներ, ազգային տարազներ եւ ասեղնագործ իրեր՝ որոնք կարող են լինել նաեւ ձերը՝ աշխարհի որ ծայրում էլ լինեք: Բացի այդ, կայքի այցելուները կարող են օգտվել տոհմագրության ծառայությունից, ինչը հնարավորություն կտա ծանոթանալ տոհմի պատմությանը՝ բացատրություններով, պատմություններով, մեջբերումներով, փաստաթղթերով, աղբյուրներով, դրանց պատճեններով: Ի դեպ, կարող եք դիմել ձեր տոհմի գերբն ունենալու համար՝ տարբեր ձեւաչափերով:
Կայքում կարեւոր տեղ է տրվելու նաեւ լուրերին՝ թարմացման ամենօրյա ռեժիմով: Դրանք կլուսաբանեն հանրությանը հետաքրքրող իրադարձություններն ու նորությունները՝ ինչպես Հայաստանից, այնպես էլ արտերկրներից:
Հարթակի շնորհանդեսին, որը տեղի ունեցավ դեկտ. 16-ի երեկոյան, «Թեքեյան կենտրոնում», ներկա էին ՀԹՄՄ անդամներ, հյուրեր, ինչպես նաեւ Միության գործընկերները՝ 31 հեղինակ եւ արտադրող, որոնց միավորել է մեկ բան՝ հայկական մշակույթի տարածումը, հանրահռչակումը:
Հայաստանի Թեքեյան մշակութային միության նախագահ Ռուբեն Միրզախանյանը շնորհակալություն հայտնեց արվեստագետներին համագործակցության համար, իսկ ներկաներին վստահեցրեց՝ Միությունն իր առջեւ խնդիր է դրել մեկ տարի հետո բազմապատկել գործընկերների թիվը եւ աշխարհին ներկայացնել հայ մշակույթը՝ ժամանակակից արվեստագետների նորովի մեկնաբանմամբ: Ռուբեն Միրզախանյանը կարեւորեց նաեւ կայքի լրատվական դերը, որում կներկայացվեն ոչ միայն տեղական, այլեւ սփյուռքի՝ հայալեզու եւ օտարալեզու մի շարք լրատվականներ:
«Առաջիկայում կայքում հասանելի կլինեն նաեւ այլ ծառայություններ՝ այդ թվում նաեւ գենետիկ անձնագրի, որում կներկայացվեն գենետիկ հետազոտության արդյունքները ամենատարբեր ուղղություններով: Բացառիկ է, երբ վերոնշյալ եւ առաջիկայում իրագործվելիք մի շարք ծառայությունները ներկայացվում են համատեղ. վստահեցնում եմ՝ սա լինելու է համահայկակակն մշակութային հարթակ»,-հավելեց ՀԹՄՄ նախագահ Ռուբեն Միրզախանյանը:
Հայաստանի ժողովրդական նկարիչ Փարավոն Միրզոյանը հարթակում ներկայացված հեղինակների անունից շնորհակալություն հայտնեց նման ձեռնարկի համար: «Պետք է շնորհակալ լինել Հայաստանի Թեքեյան մշակութային միությանը, որը շարունակում է իր մշակութապահպան գործունեությունը՝ աշխարհին ցույց տալու, թե ով ենք մենք: Միությունն այն կառույցներից է, որ պատիվ կբերի մեր ժողովրդին»,-հավելեց Փարավոն Միրզոյանը:
Նշենք, որ կայքի մասին առավել մանրամասն կարող եք դիտել հետեւյալ հղմամբ. https://youtu.be/YqL39tT60Tk:
