Վերաքննիչ քրեական դատարանըՙ դատավոր Տիգրան Սիմոնյանի նախագահությամբ, բավարարել է դատախազության բողոքը եւ կայացրել «Սիսական» ջոկատի հրամանատար Աշոտ Մինասյանի նկատմամբ կալանավորումը որպես խափանման միջոց ընտրելու մասին որոշումը:
Հիշեցնենք, որ Աշոտ Մինասյանին կալանավորելու առաջին փորձը եղել է 2020 թվականի նոյեմբերինՙ Նիկոլ Փաշինյանիՙ կապիտուլյացիոն հայտարարության փաստաթղթի ստորագրումից հետո, երբ տեղի էին ունում զանգվածային ձերբակալություններ: Այդ օրերին ձերբակալվեց նաեւ Աշոտ Մինասյանը:
«Սիսական» ջոկատի հրամանատարը մեղադրվում է իշխանության յուրացումը նախապատրաստելու, պետական, քաղաքական կամ հասարակական գործչի գործունեությունը դադարեցնելու նպատակով սպանության նախապատրաստման եւ ապօրինի զենք-զինամթերք պահելու մեջ:
Ուղիղ մեկ տարի առաջ մեծ աղմուկ բարձրացավ, թե իբր Աշոտ Մինասյանը պատրաստվում է Նիկոլ Փաշինյանի սպանության նախապատրաստությանը: Զավեշտալի բառախաղի վերածված մեղադրանքն ավելի ընդգծեց Փաշինյանիՙ իր անձն ու իշխանությունը «վտանգներից պաշտպանելու» հոգեվարքային վարքագիծը: Սակայն մեկ տարի անց, արդեն այսօր, դատական իշխանություններն իրականացրին ազատամարտիկին կալանավորելու քաղաքական որոշումը:
Փաստաբան Միհրան Պողոսյանը դեկտեմբերի 1-ին է տեղեկացրել, որ լեգենդար հրամանատարը կալանավորվել է. «Վերաքննիչ քրեական դատարանի տարած-հետ բերած, անունով դատավոր Տիգրան Սիմոնյանի ակնհայտ ապօրինի որոշմամբ «Սիսական» ջոկատի լեգենդար հրամանատար, արցախյան երեք պատերազմների մասնակից Աշոտ Մինասյանը կալանավորվեց:
Աշոտ Մինասյանը շուրջ մեկուկես ժամ սպասում էր կալանավորվելուն: Սույն դատավորը բավարարեց քննիչիՙ դեռեւս 2020 թվականի նոյեմբերի 15-ի միջնորդությունը, որով փաստեց, որ կալանք տալու համար փաստերն էական չեն, էականը իշխանությանդ ցանկությունն է:
Ընթանում է «Սյունիքի գլխատում» օպերացիայի երկրորդ փուլը, ինչին օժանդակում են տիգրանսիմոնյան դատավորները. արդյունքըՙ առաջիկայում»:
Այս տարվա նոյեմբերի 22-ին Երեւանի ընդհանուր իրավասության դատարանը մերժել էր Աշոտ Մինասյանին կալանավորելու մասին դատախազության որոշումը, իսկ Վճռաբեկ դատարանը մասնակի բավավարել էր դատախազության բողոքը եւ գործն ուղարկել Առաջին ատյանի դատարանՙ նոր քննության:
Փաստորեն, կալանավորման որոշումը բավարարվեց:
Արցախի Մարդու իրավունքների նախկին պաշտպան Ռուբեն Մելիքյանն արձագանքել է իրողությանը. «Վերաքննիչ դատարանի նորաթուխ դատավոր Տիգրան Սիմոնյանի որոշումն այն աստիճանի ապօրինի է, որ քրեական դատավարությունից թեկուզ 3-րդ կուրսի գիտելիք ունեցող յուրաքանչյուրի մոտ կարող է միայն սարկաստիկ ժպիտ առաջացնել:
Քեզ հետ ամեն ինչ պարզ է, Տիգրան: Ափսոս»:
Հայտնի է, որ Աշոտ Մինասյանը սյունեցի է, ծնունդով Սիսիանից, եւ պարբերաբար քննադատել է իշխանությունների վարած քաղաքականությունը, հայտնել իր դիրքորոշումը, որ հայրենիքը պետք է միայն զենքով պահել:
Հրամանատարին, որի մարտական անունն Աշոտ Երկաթ է, բարձր են գնահատում թե՛ քաղաքական, թե՛ զինվորական շրջանակներում:
Նրան կալանավորելու փաստին անդրադարձել է նաեւ ԱԺ «Հայաստան» խմբակցության պատգամավոր Գեղամ Նազարյանը ՙ նշելով. «Սյունիքի գլխին կարկտաբեր ամպերը կուտակվում են: Առուշ, Մխիթար, Մենուա, Արթուր, հիմա էլՙ Աշոտ Երկաթ: Կամ գուցե ամպեր չեն կուտակվում Սյունիքի գլխին, այլ ոմն մեկի վախի նոպան է սաստկացել: Կալանավորես, չկալանավորեսՙ քո դատավճիռը Երկնքում վաղուց է կայացել: Ամեն ինչ արա, որ դատավճիռդ էս երկրի վրա կայանա, որ այն դատավճիռը գոնե մեղմվի»:
