Ընդդիմությունը հայտարարել փողոցային նոր պայքարի մեկնարկի մասին։ «Հայաստան» խմբակցության պատգամավոր, «Ազգային ժողովի» փոխնախագահ Իշխան Սաղաթելյանի փոխանցմամբՙ վարչապետ Նիկոլ Փաշինյանին պաշտոնանկ անելու ու իշխող վարչակազմից ազատվելու համար անելու են հնարավորը։ Խորհրդարանական արատահերթ ընտրություններից հետո երկրում առկա քաղաքական, սոցիալական, տնտեսական ու բարոյահոգեբանական ճգնաժամը չի նահանջել, ասում են ընդդիմադիրները։ Քաղաքագետներն ու վերլուծաբանները սակայն տարակուսում ենՙ ինչպե՞ս են հաջողելու փողոց դուրս եկողները, եթե «Հայրենիքի փրկության շարժումն» անհաջողությամբ պսակվեց, Փաշինյանն էլ ընտրություններում հաղթանակ տարավ։ Նմանատիպ տեսակետներ նաեւ իշխանությունից են հնչում։ Ազգային ժողովի «Քաղաքացիական պայմանագիր» խմբակցության պատգամավոր Հրաչյա Հակոբյանն ընդդիմադիրներիՙ փողոց դուրս գալու մեջ արտառոց ու իշխանությանը կաշկանդող որեւէ հանգամանք չի տեսնում։ Թող նորից փորձեն, ասում է, միեւնույնն էՙ չեն հաջողելու։ «ՀՀ քաղաքացիները չեն վստահելու,- «Ազգ»ի հետ զրույցում համոզմունք է հայտնում ՔՊ-ականն ու ավելացնում,- Մարդիկ ընդդիմադիրներին կապում են թալանի, բռնությունների, Մարտի մեկի ու արյունալի այլ դեպքերի հետ։ Ինչ ուզում էՙ անեն, միեւնույնն է, հասարակությունն ընտրություններով արդեն տվել է իր գնահատականը»։
Հայրենիքը փրկելու ու մեր երկրի արժանապատիիվ գոյությունն ապահովելու մասին է խոսքը, ասում է «Պատիվ ունեմ» խմբակցության քարտուղար Հայկ Մամիջանյանը , ու երբ քո առաքելությունն է դա, ապա չես կարող հաջողություն գրանցելու երաշխիքներին նայել, պետք է անես հնարավորը։ «Չեմ պատկերացնումՙ ինչպե՞ս կարելի է նստել, հաշվարկել, թե հաջողության կհասնե՞նք, պայքար սկսե՞նք, թե՞ ոչ։ Եթե անգամ 150 տոկոսով իմանանք, որ նախաձեռնությունը հաջողության չի հասնելու (այնինչ այդպես չէ), պետք է քայլեր անենք, որովհետեւ դա մեր արժեհամակարգն է։ Այնպես որՙ հայրենիքի համար չեն պայքարում ըստ նպատակահարմարության կամ միայն 100 տոկոսով հաղթանակ ապահովելու երաշխիքի դեպքում։ Հայրենիքի համար պայքարում են, որովհետեւ հայրենասեր են»,- ընդգծում է մեր զրուցակիցը։
«Պատիվ ունեմ» խմբակցության մաս կազմող ուժերի համար, վստահեցնում է ՀՀԿ-ականը, պայքարը չի էլ դադարել։ Այս կամ այն դրսեւորումներովՙ փոքր, լոկալ կամ մի քիչ ավելի մեծ, ակցիաներ ենք մշտապես արել, իսկ ՀՀԿ-ն ասել է, ասում է ու կասի, որ արտահերթ ընտրությունը վատագույն օրակարգն էր, որ կարելի էր իրագործել։ «Պատիվ ունեմ» խմբակցությունը պատրաստ է կանգնել ցանկացած ազգային, իրական ընդդիմադիր ընդվզման կողքին, կիսել պատասխանատվությունն ու աշխատանքի բեռը, միայն թե մեր երկրի արժանապատվությունը վերադառնա»,- հավելում է պատգամավորը։
Մամիջանյանի խոսքովՙ Փաշինյանը նույնիսկ բանավոր համաձայնությամբ է հողեր հանձնել, համաձայնելՙ վաճառել դրանք, ու Սյունիքում այսօր տիրող իրավիճակը մեծամասամբ դրա հետեւանքն է․ «Իշխող խուտնայից ամեն ինչ սպասելի է, ու մեր նպատակը վատագույն, բայց հնարավոր սցենարները կանխելն է։ Կարող եմ ենթադրել, որ նոյեմբերի 9-ին Մոսկվայում տեղի ունենալիք հնարավոր եռակողմ հանդիպման մասին հայտարարությունը կարող է կազմակերպված արտահոսք լինել, որպեսզի հասարակության զգոնությունը բթացնեն։ Այսինքնՙ նմանատիպ մի քանի արտահոսքեր ապահովեն, վերջում իրական դավաճանական գործողություն իրականացնեն։ Տարբերակները շատ-շատ են»։
«Այսինքնՙ հնարավո՞ր է ինչ-որ բան կանխել»,- հարցին հեռտորական հարցո՞վ է պատասխանում․ «Եթե իմանաքՙ ինչ-որ բան հնարավոր չէ կանխել, ուրեմն ոչինչ չե՞ք նախաձեռնելու»։
Ընդդիմադիրների փողոցային պայքարի մեկնարկն ուշացած համարող քննադատներին «Հայաստան» խմբակցության պատգամավոր Գեղամ Մանուկյանն «էշի ու իշատերի» մասին հայտնի առակն է հիշեցնում։ Հավելումՙ ամեն ոք կարող է դատողություններ անել, դիտողություն ունենալ, բայցեւ յուրաքանչյուրն ազատ է իր գործողություններում, այդ թվումՙ ընդդիմությունը, «Հայաստան» դաշինքն ու ՀՅԴ-ն։
«Բողոքի գործողություններն այնպես չէ, որ դադաերցված էին, «Դաշնակցության» երիտասարդական ու ուսանողական միությունները կառավարության շենքի դիմաց մշտապես են բողոքի ակցիաներ իրականացրել։ Ինչ վերաբերում է նոյեմբերի 9-ին ու 10-ին նախանշված հանրահավաքին, ապա փոքրիկ ճշտում անեմ․ դեռեւս երկու շաբաթ առաջ «Դաշնակցությունը» Երեւանի քաղաքապետարան հայտ էր ներկայարցել ամսի 9-ին ու 10-ին հանրահավաքներ ու երթ անցկացնելու համար։ Ոստիկանությունը բացական, բայցեւ հետաքրքիր պատասխան էր ուղարկելՙ նշելով, որ «անցնող տարվա պատերազմը կործանարար հետեւանք ունեցավ Արցախի, Հայաստանի ու ամբողջ հայ ազգի համար, ու հաշվի առնելով, որ հանրության մեջ պահպանվում է հուզական մթնոլորտը, նպատակահարմար չէ երթերը կառավարական շենքերի մոտ արտոնել»։ Ոստիկանությունը հստակՙ սեւը սպիտակի վրա, գրել ու գնհատական էր տվել, որ հանրության մեջ կա դժգոհություն ։ Եվ փաստորեն անգամ իրավապահ համակարգի ներկայացուցիչներն էին արձանագրել, որ իշխանության պնդումը, թե ընտրությունների միջոցով հանգուցալուծվել է հասարակության մոտ առկա ճգնաժամը, հեռու է իրականությունից»,- ներկայացնում է Մանուկյանը։
Նրա փոխանցմամբՙ երբ նոյեմբերի 9-ին ու 10-ին հանրահավաք անցկացնելու հայտ էին ներկայացնում, Փաշինյանիՙ նոր փաստաթուղթ ստորագրելու մասին տեղեկության արտահոսքը չէր եղել։ Բայց դա չի ենթադրում, ընդգծում է, որ որեւէ այլ օր հանրահավաք չի լինելու։ Վստահեցնում էՙ ոչ միայն դժգոհության ակցիաներ ու երթեր, այլեւ հնարավոր նոր հայտարարության ստորագրության կասեցման փորձեր են լինելու։ «Ազգային ժողովի ընդդիմադիր փոխխոսնակն իր խոսքում նշել էր, որ մեզ հայրենիքին է պետք, այլ ոչ թե իշխանության հեռացումը հայրենատվությունից հետո։ Այսինքնՙ մեր խնդիրը նման զիջողական փաստաթղթերի կասեցումն է, ոչ թե փաստի արձանագրումից հետո իշխանությունից դժգոհելը։ Վստահ եմՙ երկրում մտահոգ քաղաքացիների թիվը շատ ավելին է, քան այն մարդկանց քանակը, որոնց համար որեւէ էական նշանակություն չունի հայրենիքը, հայրենիքի սահմանն ու անվտանգությունը։ Իսկ մտահոգ քաղաքացիները, բնականաբար, իրենց դիրքրոշումն արտահայտելու են»։
