ԻՄԱՍՏՆՈՒԹՅԱՆ ՊԱԿԱՍ ԱԶԳԱՅԻՆ ԺՈՂՈՎՈՒՄ

6

Որ Ազգային ժողովում այսուհետ հաճախ կանցնեն ձեռնամարտի, դա նոր գումարման խորհրդարանի աշխատանքի առաջին օրվանից էինք կանխատեսելՙ Աժ-ում հավաքվել է այն հակամարտ կոնտիգենտը, որը սովորաբար մի կայծից բռնկվում է: Այս առումով ԱԺ նախագահությունում, իհարկե, հարկավոր էր կյանքի փորձով եւ իմաստուն խոսնակ, որին Ալեն Սիմոնյանը չի ձգում, քանի որ նրա մոտ իր անձը, իր խոսքն ու ասածը տղավարի պաշտպանելու մղումը, ինքնահարգանքը իր եւ իր պաշտոնի հանդեպ գերադիր են, քան խորհրդարանում թեկուզ մարտավարական նահանջով եւ որոշ բան զիջելով հնարավորինս խաղաղություն եւ աշխատանքային մթնոլորտ պահպանելու անհրաժեշտությունը:

Օրինակՙ այսօր, Ազգային ժողովում, կառավարության հնգամյա ծրագրի քննարկմանը սովորաբար կոշտ ընդդիմադիր պատգամավորուհի Աննա Մկրտչյանի պահվածքին Ալեն Սիմոնյանի արձագանքը բոլորովին էլ համարժեք չէր, իսկ ավելի ստույգՙ անհամարժեք էր: Պարզապես արգահատելի էր նայել, թե ոնց են համազգեստով տղամարդիկ, թող որ մի քիչ լեզվանի պատգամավորուհուն վրա տալիս եւ ստիպում դուրս գալ դահլիճից: Երբեմն պետք է որոշ բաներ չտեսնելու տալՙ ավելի չսրելու իրավիճակը, այնպես, ինչպես հայ ընտանիքի ծնողներն են անում, չնկատելով իրենց զավակների այս ու այն ոչ համարժեք պահվածքը: Իսկ ԱԺ նախագահը, անգամ լռեցնելով ամբիոնի մոտ կանգնած վարչապետին, անվտանգություն էր կանչումՙ կին պատգամավորին կրկին դուրս հրավիրելու համար դահլիճից:

Ասաՙ որ դուք իսկի մի խորհրդարանում չեք կարողանում խաղաղություն հաստատել, ո՞նց եք հավակնում Հայաստանի ու Ադրբեջանի միջեւ խաղաղություն հաստատել: Առհասարակՙ այսօր խորհրդարանում սաստիկ շոգ էրՙ ուղիղ եւ փոխաբերական իմաստովներով, կրքերն այնքան էին բորբոքվել, որ խորհրդարանի դահլիճում իշխանական եւ ընդդիմադիր պատգամավորները ընդմիջման ժամանակ դահլիճի ներսում, անվտանգության աշխատողները ներառյալ, քաշքշում էին իրար, անգամ Արծվիկ Մինասյանն է թեթեւ վնասվածք ստացել, նրա վերնաշապիկն էլ պատռել են:

Առավոտյան էլ մի խումբ լրագրողներ ԱԺ լրագրողների օթյակում բողոքի գործողություն իրակացրին սահմանափակումների դեմ, սակայն այդպես էլ որեւէ փոփոխություն լրագրողների աշխատանքը չսահմանափակելու առումով դեռ չի երեւում:

Մինչդեռ շատ կարեւոր քննարկումներ են Ազգային ժողովումՙ ծրագրային, գաղափարական եւ Հայաստանի ապագայի առումով, որտեղ ընդդիմությունը պետք է դրսեւորի իր եւ իշխանության սկզբունքային տարաձայնությունները: Կառավարության ծրագրով առաջին հայացքից երբեմն նաեւ ոչ ակնհայտ ձեւով շատ էական փոփոխություններ են առաջարկվում ե՛ւ բանակում, ե՛ւ կրթության մեջ, ե՛ւ Արցախի հարցի հետ կապված: Ծրագրում երեւում է նոր հայկական տարածքների զիջման եւ աննպաստ համաձայնագրի ստորագրման հեռանկարը: Քննարկմանը դեռ անդրադարձ կանենք, հատկապես բոլորիս ճակատագրի հետ կապված կարեւոր խնդիրների առումով: