2019 թվականի նոյեմբերի 14-ին ՀՀ կառավարության ընդունած «Փոքր եւ միջին ջերմատնային տնտեսությունների ներդրման պետական աջակցության» ծրագրի մեկնարկից ի վեր պետական բյուջեից ֆերմերներին 165 մլն դրամի աջակցություն է տրամադրվել:
Փոքր եւ միջին ջերմատնային տնտեսությունների ներդրման ծրագրի նպատակն էր փոքր եւ միջին ջերմատների կառուցման եւ դրանց տեխնոլոգիական ապահովման պետական աջակցության միջոցով ավելացնել ջերմատնային տնտեսությունների մակերեսն ու արտադրության ծավալները, բարձրացնել արտադրանքի մրցունակության մակարդակը, նպաստել գյուղատնտեսությունում տնտեսավարողների եկամուտների ավելացմանը:
Ծրագրից օգտվելու համար անցած 2 տարում նախարարություն է դիմել 190 շահառու, սակայն հուլիսի 15-ի դրությամբ ջերմոցի շինարարությունն ավարտել են միայն 7-ը: Իսկ բերք ստացողների թիվը շատ ավելի փոքր է: Քանի որ պետական աջակցությամբ կառուցված ջերմատներից միայն 2-ն են կառուցվել 2020թ-ին, հետեւաբար այս տարի հուլիսի 1-ին նախարարությունը միայն այդ երկուսից է հաշվետվություն ստացել:
Ըստ էկոնոմիկայի նախարարության տրամադրած տվյալների, շահառուներից մեկը` 2880 քմ արտադական տարածքով ջերմատնից մինչ օրս ստացել է 8 000 կգ բուլղարական պղպեղ, իսկ մյուսը` 1377 քմ արտադրական տարածքով ջերմատնից` 61 965 կգ լոլիկ:
Ստացվում է, որ երկու ջերմատների տերերին պետությունը վճարել է շուրջ 60 մլն դրամ, իսկ դրանցից ստացված բերքի միջին շուկայական արժեքը շուրջ 50 մլն դրամ է:
Դոլարի փոխարժեքի բարձրացման հետեւանքով թանկացել են թունաքիմիկատները, պարարտանյութը: Մյուս կողմիցՙ նախորդ տարվա հուլիսի 19-ից ջերմոցատերերի համար բարձրացել է գազի գինը, օրինակՙ ջերմոցային տնտեսությունները ջեռուցման սեզոնինՙ նոյեմբերի 1-ից մարտի 1-ն ընկած ժամանակահատվածում, 1000 քմ-ի դիմաց վճարում են 224 դոլարՙ նախկին 212- ի փոխարեն:
Ծրագրի հեղինակները համոզված են, որ հետագա տարիների շահույթով ծրագիրն արդարացնելու է պետության կատարած ծախսերը: Ի դեպ, նշված 2880 քմ-անոց ջերմոցը ծրագրի շրջանակներում կառուցվածներից մեծագույնն էր: Իսկ ամենափոքրը 960 քմ է:
«Փոքր եւ միջին ջերմատնային տնտեսությունների ներդրման պետական աջակցության» ծրագրի «Ջերմոցային ասոցիացիա» ՀԿ նախագահ Պողոս Գեւորգյանի կարծիքով, փոքր ջերմոց պահելը ծախսատար է:
«Գյուղացիները, փոքր ջերմատներ մշակելով «տակից» չեն կարողանալու դուրս գալ: Ապրանքի իրացման հարցով էլի «պրոբլեմ» է լինելուՙ քանակությունը քիչ է, արտահանել չեն կարողանալու, իսկ տեղական շուկայում էլ լճացում է լինելու, որովհետեւ դրսից ներկրումները շարունակվում են»,- նշում է նա:
Հայաստանում ներկա պահին առկա ջերմոցների ու ջերմատների ընդհանուր մեկերեսը, պաշտոնական տվյալներով, շուրջ 1 300 հա է, որից 300-ը կառուցված են ժամանակակից տեխնոլոգիաներով:
