– Կամ էս կողմ կլնեմ, կամ էն… ճիշտ է, վախենում եմ, բայց վարակի վախը ավելի մեծ է, քան պատվաստանյութից:Ես վստահում եմ մասնագետներին, ինչի համար էլ եկել եմ պատվաստվելու: Սակայն մինչեւ արդյունքը չտեսնեմ, մյուսներին չեմ կարող խորհուրդ տալ:
Հայաստանում կորոնավիրուսի դեմ պատվաստումներն արդեն սկսվել են: Եվ չնայած աշխարհում ռուսական պատվաստանյութի հեղինակությունը օր օրի մեծանում է, Հայաստանը ռազմավարական դաշնակցից մինչեւ հիմա կարողացել է ստանալ ընդամենը 15 հազար դեղաչափ, որը կբավականացնի 7 հազար մարդու, փոխարենը 55 տարեկանից բարձր քաղաքացիներն այժմ պատվաստվում են բրիտանական «AstraZeneca»-ով, որի դեմ Հայաստանում հանրային լուռ ընդվզումներ կան:
«Դեռ միայն 5 հոգու ենք պատվաստել: Հիմա բոլորը տեղեկացված են, քանի որ սոցկայքերից օգտվում են, տարբեր հոդվածներ են կարդում ինչպես վարակի, այնպես էլ պատվաստումների վերաբերյալ: Մենք էլ իրազեկում ենք միայն, չենք պարտադրում. գիտակից մարդիկ են` իրենք պետք է որոշեն»,-ասում է վարակաբան տիկին Սարուխանյանը , ապա հավելում.«Ես ինքս էլ վարակվել եմ կորոնավիրուսով, եւ եթե պատվաստվելու լինեմ, ապա միանշանակ «Սպուտնիկ V»-ով կուզեմ»:
Թիվ 13 պոլիկլինիկայում AstraZeneca-ով պատվաստվելու ցանկություն է հայտնել 12 մարդ, բայց ներկայացել են միայն 7-ը:Չնայած աշխարհում այսօր պատվաստանյութերի դեֆիցիտ կա, Հայաստանում պատվաստվելու հնարավորությունից քաղաքացիները կարծես թե չեն շտապում օգտվել:
«Միլիոնից մի հոգի ա մեռնում, կարողա էդ լինեմ ես,երաշխիք տալի՞ս ես, եթե հաՙ էսօր էլ գնամ պատվաստվեմ: Ոչ մի մասնագետ ըտենց երաշխիք տալ չի կարող. ես էլ վախենում եմ»,-ասում է քաղաքացիներից մեկը:
Քաղաքացիներից շատերը ավելի շատ վախենում են պատվաստվելուց, քան վարակվելուց: Պատճառը տարածված լուրերն ենՙ պատվաստանյութի որակի ու հնարավոր բացասական հետեւանքների մասին:
Ինչ վերաբերում է պատվաստվողների փոքր թվին, ապա ըստ բժշկի, բնականոն հունի մեջ ընկնելու համար ժամանակ է պետք.
«Յուրաքանչյուր նոր գործընթաց, մանավանդ եթե խոսքը վերաբերում է պատվաստումներին, սպասելի էր, որ ընթացքը պետք է լիներ այսպես: Սա, կարծում եմ, ժամանակավոր երեւույթ է, եւ ավելի շատ իրազեկում է պետք մարդկանց, ավելի շատ ինֆորմացիա է պետք, ավելի շատ շփում է պետք բժիշկների հետ, որ իրենց բոլոր հարցերը, վախերը փարատեն եւ հասկանան, որ միակ տարբերակն ազատվելու այսօրվա այս իրավիճակից, այդ պանդեմիայից, իհարկե, պատվաստման գործընթացն է»:
Մինչ բժշկի հետ էինք զրուցում, ներս է մտնում 72-ամյա Ա.Մխիթարյանը , որը եկել է պատվաստվելու: Նրան հարցնում եմ` կարելի՞ է հարցազրույց անել իր հետ, ինչին ի պատասխան հումորով ասում է. «Իհարկե, գուցե վերջին հարցազրույցս լինի»:
Հայաստանը պատվաստվում էՙ վախով, ո՞րն է կորոնավիրուսին հաղթելու բանալին, սա՛ է խնդիրը:
