«Նինվե պրես» հրատարակչությունը վերջերս լույս է ընծայել «Հայաստան, իմ սեր. տաս եվրոպացի է խոսում» ժողովածուն: Գրքի վերնագրի առաջին մասը ֆրանսերեն է, երկրորդ մասը եւ բովանդակությունըՙ անգլերեն: Հատորը լույս է տեսել ֆինլանդացի երկու հայագետներիՙ Սվանտե Լունդգրենի եւ Սերաֆիմ Սեպպաալաայի նախաձեռնությամբ եւ խմբագրությամբ: Նրանց գրչին է պատկանում նաեւ հատորի առաջին երկու գլուխըՙ «Նախաբան. Սերը պատերազմի ժամանակ» եւ «Ներածություն. Արեւմտյան մոտեցումները Հայաստանին»: Գրքում զետեղված են տարբեր սերունդների եվրոպացի հեղինակների (մի մասըՙ հայագետ գիտնականներ) հոդվածներՙ Հարալդ Բոթների (Նորվեգիա) «Հայաստան, Բոդիլ Բյորն եւ Քրագերո», Բեռնար Քուլիի (Բելգիա) «Կենդանի հիշողություններ», Ֆրանք Էնգելի (Լյուքսեմբուրգ) «Քեզ Հայաստան. իմ հայկական ուղեւորության նախաձեռնությունը», Բալինթ Կովաչի (Հունգարիա) «Իմ հայկական ճանապարհորդությունը եւ ինչպես է այն սկսվել թաքնված գրադարանում», Սվանտե Լունդգրենի (Ֆինլանդիա) «Ծիծեռնակաբերդից Հոլիվուդ. իմ հայկական ուղեւորությունը», Յակուբ Օսիեցկիի (Լեհաստան) «Ամենամեծ մրցանակը», Սթիվեն Փաունդի (Մեծ Բրիտանիա) «Դու կարող ես տեսնել ճշմարտությունն օտարի աչքերով», Քեյթ Ռոյսթերի (Դանիա) «Պատահականությո՞ւն, թե՞ Աստծո ձեռքը», Սիլվիա Շմիդի (Գերմանիա) «Փոքրը կարող է ավելի լավը լինել, կամ ինչպես ծովասերն ընկերացավ լեռների հետ» եւ Սերաֆիմ Սեպպաալաայի (Ֆինլանդիա) «Հայաստանում լինելու փիլիսոփայությունը»:
Սվանտե Լունդգրենը ֆիննաշվեդ պատմաբան է, Լունդի (Շվեդիա) համալսարանի դոցենտ, ասորիների եւ հայերի ցեղասպանությունների մասին աշխատությունների հեղինակ: Հայկական «Փրկության քարտեզ» խաղարկային-վավերագրական կինոնկարում (2015, ռեժիսորՙ Արամ Շահբազյան) հանդես է եկել որպես խոսնակ:
Արեւելյան Ֆինլանդիայի համալսարանի փիլիփոփայության պրոֆեսոր Սերաֆիմ Սեպպաալաան հոգեւորական է, հեղինակ է տասնյակ հատորների, որոնց թվում են «Արարատից արեւելք: Գեղեցկության եւ տառապանքի 12 բանալիներ Հայաստանում» (2007), «Հայոց ցեղասպանության ժառանգությունը» (2011) եւ «Լույսի առավոտ. Հայկական աղոթքներ» (2013) ֆիններեն գրքերը (առաջինը լույս է տեսել նաեւ շվեդերենՙ Սվանտե Լունդգրենի թարգմանությամբ): Հեղինակ է նաեւ բյուզանդական, ասորական, արաբական եւ հայկական գրականությանը նվիրված անգլերեն ուսումնասիրությունների, Հայոց ցեղասպանության մասին հոդվածների (այդ թվումՙ 2016-ին «Հայոց ցեղասպանության ուսումնասիրությունների միջազգային հանդեսում» հրատարակված «Հայոց ցեղասպանությունը «Ոսկե ծիրան» կինոփառատոնում: Վավերագրական եւ գեղարվեստական հեռանկարներ» հոդվածի): Մի քանի անգամ Ֆինլանդիայից Հայաստան բերել է խմբերՙ ճանաչողական ուղեւորությունների:
«Նինվե պրես» հրատարակչությունը մասնագիտացած է ասորիների պատմության, մշակույթի եւ լեզվի մասին գրքերի լույսընծայման մեջ, սակայն նաեւ հրատարակում է գրքեր հայերի, պոնտացի հույների եւ Մերձավոր Արեւելքի այլ քրիստոնյա փոքրամասնությունների մասին:
