Արեւիկ Քեշիշյան
Նախազգուշացնում են բրիտանացի փորձագետները
Մեծ Բրիտանիայի կառավարության խորհրդականները նախարարներին նախազգուշացրել են, որ կորոնավիրուսի հետ կապված առավել խիստ միջոցառումները լոկ կհանգեցնեն տարեվերջին վարակի երկրորդ ալիքի հայտնվելուն, հաղորդում է The Telegraph թերթը։ Հոնկոնգի եւ Չինաստանի նման երկրների օրինակով կոշտ միջոցառումների ձեռնարկումը կարող է միայն հետաձգել վարակի բարձրակետը այնքան ժամանակ, քանի դեռ այդ միջոցառումները չեն վերացվել։
Այս տեղեկությունը ի հայտ է եկել նախարարներին ուղղված այն բազմաթիվ նախազգուշացումների պայմաններում, որ կառավարությունը կուժեղացնի սոցիալական հեռավորության միջոցառումները, ներառյալ բացօթյա մարզումների արգելումը, եթե հասկանալի դառնա, որ մարդիկ չեն պահպանում կանոնները։
«Թեեւ խստացումները վարակի տարածումը նվազեցնում են հիվանդությունների թիվը կարճաժամկետ առումով, դրանց չեղարկումից հետո, հավանաբար, կլինի նոր համաճարակ։ Նայած թե որքան կշարունակվեն խստությունները, հիվանդության բարձրակետը կարող է արձանագրվել աշնանը», հայտնել են նախարարներին։
Վարքային եւ սոցիալական սահմանափակումների ներկայիս քաղաքականությունը, ամենայն հավանականությամբ, կհարթեցնի վարակվածների կորագիծը, եւ նվազ արտահայտված բարձրակետ կարող է արձանագրվել ամռան սկզբներին, կարծում են գիտնականները։
Փորձագետները գտնում են, որ չինական Ուհան քաղաքի խստությունները, երբ բնակիչները գամված էին իրենց տներում, իսկ հետո դրանց կտրուկ չեղարկումը կարող են հանգեցնել մի նոր եւ է՛լ ավելի մեծ բարձրակետի։ Մի շարք ասիական երկրներ ձեռնարկել էին ավելի ու ավելի խիստ միջոցներ, այդ թվում տուգանքներ եւ բանտարկության ժամկետներ տանը մնալու պահանջը խախտելու համար, նաեւ մարդիկ պարտադրված էին կրել իրենց տեղաշարժերը ցուցադրող ապարանջաններ, որպեսզի հարկադրաբար մեկուսացվածները չհեռանային տներից։
Որոշ գիտնականներ նախազգուշացնում են, որ եթե վիրուսի տարածում առհասարակ տեղի չունենա, ապա բնակչության մեջ չի մշակվի «հավաքական իմունիտետ»։ Վերջինս վիրուսին թույլ կտա անցնել բնակչության խմբերի միջով եւ ապա ոչնչանալ։
The Telegraph-ը նշում է, որ Չինաստանը, Հոնկոնգը եւ Սինգապուրը վերջին շաբաթներին արձանագրեցին դեպքերի աճ, երբ միջոցառումները մեղմացվել էին, եւ մարդիկ կրկին ստացել էին ազատ տեղաշարժվելու հնարավորություն։
