Թուրքիայի նախկին վարչապետ Ահմեթ Դավութօղլուի կողմից հիմնադրված «Ապագայի կուսակցության» գործադիր խորհրդի անդամ Էթյեն Մահչուփյանը հայտարարել է, որ եթե Դավութօղլուն պատմի այն, ինչ գիտի, ապա Թուրքիայի պատմությունը կվերաշարադրվի:
«Եթե Ահմեթ Դավութօղլուն պատմի այն ամենը, ինչ գիտի ու ինչի միջով անցել է, ապա ոչ վաղ անցյալի ողջ մեր պատմությունը նորից կվերաշարադրվի: Ես դա գիտեմ, որովհետեւ որոշ բաներ լսել եմ, բայց պատմելն իմ գործը չէ», ասել է հայ ազգի գործիչը:
Մահչուփյանի խոսքովՙ Թուրքիայի նախագահ եւ իշխող Արդարություն եւ զարգացում կուսակցության (AKP-ԱԶԿ) ղեկավար Ռեջեփ Թայիփ Էրդողանի կախվածությունը Ազգայնական շարժում կուսակցությունից (MHP-ԱՇԿ) ավելի շատ է, քան ԱՇԿ-ի կախվածությունը Էրդողանից:
«Այն պարագայում, երբ Էրդողանը մեկուսացված է եւ աշխատում է այնպիսի անտաղանդ թիմի հետ, ինչպիսին հիմա է, չի կարող լավ ռազմավարություն մշակել: Նա ամեն ինչ անելու է իր իմացածի պես: Չպետք է մոռանալ նաեւ իր գործընկերոջը (նկատի ունի ԱՇԿ-ի ղեկավար Դեւլեթ Բահչելիին-խմբ.): Էրդողանը այլեւս չի կարողանում միայնակ որոշումներ ընդունել»,- ասել է Մահչուփյանը:
