Նախիջեւանի ուղղությամբ ադրբեջանցիների կողմից հրադադարի ռեժիմը խախտվելուց հետո, հայկական կողմը ըստ երեւույթին արժանի հսկա հարված է հասցրել ադրբեջանցիներին: Դրա մասին են վկայում Ադրբեջանի ՊՆ վերջին օրերի հայտարարությունները:
Օրինակ, հուլիսի 17-ի վաղ առավոտյան, հերքելով իրենց զինուժի կողմից հայկական դիրքերն ու բնակավայրերը գնդակոծելու փաստը, ադրբեջանական կողմը հայտարարել է, որ հայկական զինուժի մարտական հենակետերից դիպուկահար հրացանով կրակ են բացել Գյոգոյլի շրջանի տարածքում աշխատող տրակտորի ուղղությամբ: Հաջորդ օրըՙ հուլիսի 18-ին, Ադրբեջանի ՊՆ-ն հայտարարություն տարածեցՙ պնդելով, որ հայկական զինուժը խոշոր տրամաչափի զինատեսակներից կրակ է բացել Ղազախի շրջանում գտնվող Շըխլը գյուղի մոտ տեղակայված մարտական հենակետի վրա, որի հետեւանքով վիրավորվել է ադրբեջանական բանակի զինծառայող Ջեյհուն Բայրամովը:
