ԿԱՅԱՑԱՎ ՌԱԿ ԳԵՐԱԳՈՒՅՆ ԽՈՐՀՐԴԻ ՀԵՐԹԱԿԱՆ ՀԱՎԱՔԸ

Ամերիկայի Միացյալ Նահանգների Ինգլվուդ քաղաքում (Նյու Ջերսի) կայացավ Ռամկավար Ազատական կուսակցության Գերագույն խորհրդի հերթական նիստը: ՌԱԿ Գերագույն խորհրդի հավաքի նպատակն էր քննարկել կուսակցության զարգացման հեռանկարները, նախանշել նպատակները եւ մշակել ընդհանուր քաղաքականություն: Նիստը նախագահեց ՌԱԿ Գերագույն խորհրդի նախագահ, ՌԱԿ Կենտրոնական վարչության փոխատենապետ Վարդան Նազիրյանը (Լոս Անջելես), որը հավաքի ավարտին ներկայացրեց իր հրաժարականը, ինչը պայմանավորեց իր զբաղվածությամբ, սակայն հավաստեց, որը շարունակելու է մաս կազմել ՌԱԿ Գերագույն մարմնին իր նպաստը բերելու համար կուսակցության հետագա զարգացմանը: ՌԱԿ Գերագույն խորհրդի նախագահի պաշտոնակատար նշանակվեց Հրաչ Գույումջյանը (Լոնդոն), իսկ փոխատենապետ` Հակոբ Վարդիվարյանը (Նյու Ճերսի): Գերագույն Խորհրդի նիստին մասնակցում էին նաեւ Երվանդ Ազատյանը (Դետրոյթ), Արշավիր Գյոնջյանը (Մոնրեալ), Արտո Մանուկյանը (Մոնրեալ), Խորեն Գալինյանը (Եգիպտոս), Գեւորգ Մարաշլյանը (Վաշինգտոն), Վարդգես Գուրույանը (Լոս Անջելես): Գերագույն խորհրդի նիստին ներկա էին նաեւ Հայաստանից ՌԱԿ Կենտրոնական վարչության անդամներ Գայանե Մուրադյանը եւ Արմեն Մանվելյանը: Գերագույն խորհուրդը հաստատեց նաեւ ՌԱԿ սփյուռքյան մամուլի ֆինանսավորման ծրագիրը, ինչպես նաեւ քննարկեց Հայաստան-Սփյուռք զարգացման հեռանկարները ու հարաբերությունների խորացման միտումները: ՌԱԿ Գերագույն Խորհուրդը իր պատրաստակամությունը շեշտեց շարունակելու իր աջակցությունը Հայաստանի Հանրապետությանը եւ Արցախին: