Լոնդոնի Ռութլեջ (Routledge) հրատարակչատունը լույս է ընծայել Նյու Յորքի Այոնա քոլեջի Արեւելյան Եվրոպայի եւ Միջին Արեւելքի պատմության ավագ դասախոս Ջորջ Բուռնությանի «Հայաստանը եւ կայսրության անկումը: Երեւանի նահանգը 1900-1914 թթ.» (Armenia and Imperial Decline: The Yerevan Province, 1900-1914) խորագրով նոր հատորը անգլերն լեզվով, որը քննարկում է տարածաշրջանում մասնավորապես հայկական Առաջին հանրապետության, բայց նաեւ խորհրդային շրջանի եւ ներկայիս Երրորդ հանրապետության առջեւ ծանրացած խնդիրները:
Կասկած չկա, որ Թիֆլիսի եւ Բաքվի քաղաքացիների հետ համեմատած Երեւանի նահանգի բնակիչները զիջում էին եւ մեծ դերակատարություն չունեին Հարավային Կովկասի քաղաքական եւ տնտեսական զարգացումներում: Այդուհանդերձ, ինչպե՞ս Առաջին հանրապետության կառավարությանը հաջողվեց 1917-ի նոյեմբերից 1920-ի դեկտեմբերը կառավարել երկիրը համաճարակի, սովի, թշնամու հարձակումների եւ ավելի քան 300 հազար գաղթականների առկայության պայմաններում: Ինչպե՞ս ի վիճակի եղավ կրթական, ոստիկանական, առողջապահական, դատական եւ այլ անհրաժեշտ մարմիններ ստեղծել: Եվ վերջապես, ինչպե՞ս հետագայում Խորհրդային Հայաստանը կարողացավ գոյատեւել առանց ունենալու որոշակի ենթակառուցվածքներ: Այս հարցերի պատասխաններն է փորձում տալ հեղինակը իր նոր գրքում:
Բուռնությանը ծնվել է Իրանում. թեկնածուական աստիճանը ստացել է 1976-ին, Լոս Անջելեսի Կալիֆոռնիա համալսարանում որպես հայոց, իրանական եւ ռուսական պատմության մասնագետ: Դասավանդել է այդ եւ բազմաթիվ այլ (Կոլումբիա, Թաֆթս, Ռաթջերս, եւայլն) ամերիկյան եւ այլ երկրների (Կանադա, Իրան, Ավստրալիա) համալարաններում: Տիրապետում է հայերենից բացի ռուսերենին, պարսկերենին եւ լեհերենին: Հոդվածներով հանդես է եկել ինչպես հայկական, այնպես էլ օտար թերթերում եւ ամսագրերում:
