Վարչապետ Նիկոլ Փաշինյանի հանձնարարականից հետո (այս բառը մնաց, չնայած ՀՀ վարչապետն այլեւս Կարեն Կարապետյանը չէ) ոստիկանությունը մշակել է ճանապարհային երթեւեկության կանոնները խախտելու դեպքում վարչարարության փոփոխություն: Մասնավորապես մի շարք խախտումներ կատարելու դեպքում վարորդներն այլեւս չեն տուգանվի: ՃՈ պետի տեղակալ Արմեն Խաչատրյանն ասել է, որ եթե օրինակ վարորդը մեքենան վարելու ընթացքում ծխել է, մեքենայի սահմանված հատվածում բացակայել է տեխզննության կտրոնը, կամ վարորդը մանեւրելիս չի օգտագործել լուսային թարթիչը, ապա նա կարող է եւ չտուգանվել, դե այսինքն հանգիստ կարող է ե՛ւ քշել, ե՛ւ ծխել, մեքենայի տեխզննման կտրոնը մոռանալ տանը, կամ չբարկանալ երեխայի վրա, եթե նա պատահաբար պատռի այն, եւ վերջապես ամեն աջից ձախ, կամ ձախից աջ գնալիս լուսային թարթիչը պարտադիր միացնելու պարտավորություն չզգալ: Մի խոսքովՙ դուխով երթեւեկել:
Բայց սա դեռ ամենը չէ: Բանն այն է, որ նշված եւ այլ մի շարք դեպքերում իրավախախտ վարորդին տուգանելու կամ պարզապես զգուշացնելու (բանավոր) որոշում կայացնելու է ճանապարհային ոստիկանըՙ սեփական հայեցողությամբ: Այսինքն, եթե օրինակ տվյալ ճանապարհային ոստիկանի սանիկը, կամ քավորը, կամ մորաքրոջ որդին վարելիս ծխի ու դա տվյալ ոստիկանը նկատի, կամ եթե նա տեսնի, թե ինչպես է իր քավորը ճանապարհին երթեւեկելիս մանեւրումՙ առանց լուսային թարթիչը միացնելու եւ կանգնեցնի մեքենան, ապա կարող է պարզապես զգուշացնել իր հարազատներին, որ այդպես չանեն: Բայց եթե նույն ոստիկանը նույն խախտումն արձանագրի ոչ իր քավոր-մորքուրի տղաների մոտ, ապա կարող է եւ տուգանել: Այնպես որ, բոլոր այն վարորդները, որոնց քավորները, սանիկները, մորքուրի, կամ հորքուրի, հորեղբոր կամ քեռու եղբայրները ճանապարհային ոստիկան են, շնորհավորում եմ, դուք միայն զգուշացվելու եք:
Բայց սա էլ դեռ ամենը չէ: Ոստիկանությունը, ինչպես հայտնում է «Ազատություն» ռադիոկայանը, լավ լուր ունի արագաչափերից եւ տեսանկարահանող սարքերից դժգոհող վարորդների համար: Ոստիկանությունն առաջարկում է արդարադատության նախարարությանը, որպեսզի այդ կառույցն էլ առաջարկի Ազգային ժողովին, որպեսզի խորհրդարանը հանդես գա համաներման ակտ ընդունելու նախաձեռնությամբ: Այսինքն 2012-17 թվականների տուգանքների համար նախատեսվում է համաներում: Ընդ որում, եթե ԱԺ-ն ընդունի նման որոշում, ապա կչեղարկվի 13,7 միլիարդ դրամի չափով տուգանք: Լավ, դեռ պետական բյուջեն 13,7 միլիարդ դրամից զրկելը մի կողմ (հաշվի առնելով, որ նոր կառավարությունում որեւէ մեկը կոռումպացված չէ, կասկածից վեր է, որ այս տուգանքները հենց բյուջե էլ գնալու էին), այս որոշման կամ նախաձեռնության հարցում արդարության հարց չկա՞: Պարզ է, չէ՞, որ 2012-17 թվականներին եղել են նաեւ վարորդներ, որոնց տուգանել են եւ որոնք պարտաճանաչ գնացել ու վճարել են, ի՞նչ է հիմա ստացվում, փաստորեն այդ մարդիկ կարող էին եւ չվճարե՞լ: Բայց սա էլ մի կողմ, իսկ կարելի՞ է այսուհետ ոչ մի տուգանք չվճարել, չէ՞ որ հայտնի չէ, թե վաղն ով կքայլի, ինչի կհասնի ու նոր ոստիկանությունը ի՞նչը համաներելու առաջարկով հանդես կգա:
Չէ, լավ է, որ մարդիկ ազատվում են տուգանքներից, բայց ճի՞շտ է, որ նրանք մինչեւ հիմա չեն վճարել օրենքով սահմանված տուգանքը. փաստորեն ճիշտ է: Ճիշտ է եւ այն, որ բոլոր նրանք, ովքեր վճարել են, սխալ են արել. կարող էին եւ չվճարել:
Մի խոսքով, այնպիսի տպավորություն է առաջանում, որ նոր կառավարության անդամներըՙ նոր ոստիկանապետի հետ միասին հեղափոխություն իրականացնելիս այնքան քայլեցին, որ պարզապես ուզում են նստել մեքենա ու հանգիստ ծխելՙ առանց տուգանվելու կամ տուգանքների մասին մտածելու:
Ի դեպ, ՀՀ քաղաքացին ուզում է, որ իրեն ոչ մի հարցում չտուգանե՞ն, թե՞ ուզում է, որ իր վճարած տուգանքները հաստատ բյուջե գնան…
