Տաջիկստանի խուլ գյուղերից մեկի դպրոցի պատմության ուսուցիչ, 23-ամյա Սաիդշո Ասրորովը ոչ վաղ անցյալում ամուսնության ու հարսանիքի մասին չէր էլ մտածում: Բայց ամեն ինչ փոխվեց Տաջիկստանի նախագահ Էմոմալի Ռահմոնի հետ հանդիպումից հետո:
Օգոստոսի 16-ին Տաջիկստանի նախագահն աշխատանքային այցով մեկնել է այն շրջան, որտեղ բնակվում է երիտասարդ ուսուցիչը: Հանդիպելով նախագահինՙ հուզված երիտասարդը նրան է նվիրել ավելի վաղ երկրի առաջնորդի պատվին գրած իր բանաստեղծությունն ու հայտնել, որ անչափ երջանիկ է նրան հանդիպելու համար:
Իր հանդեպ նման սիրուց շոյվածՙ նախագահը հետաքրքրվել էՙ արդյոք երիտասարդ ուսուցիչն ամուսնացա՞ծ է, լսելով բացասական պատասխանՙ Ռահմոնը կարգադրել է անհապաղ հարսնացու գտնել տղայի համար:
Նախագահի միջամտությամբ հարսնացուին գտել են երեք օրվա ընթացքում: Ընդ որում, թեկնածուները շատ են եղել: Ի վերջո ընտրվել է մասնագիտությամբ բուժքույր մի կին, որն ասել է, թե ինքը համաձայնել է ամուսնանալ միայն այն պայմանով, որ իր փեսացուն հետագայում չարգելի նրան աշխատել:
Ուշագրավ է, թե արդյո՞ք այս պատմությունը կնպաստի, որ Էմոմալի Ռահմոնին ձոնված բանաստեղծությունները շատանան Տաջիկստանում:
