Խոսելով Ստամբուլում մի քանի օր առաջ Երուսաղեմի թեմայի շուրջ կայացած համաժողովում, Էրդողանը կոչ է արել աշխարհի մահմեդականներին ավելի հաճախ այցելել ալ-Քուդսի (Երուսաղեմի արաբական անվանումը) ալ-Աքսա մզկիթը պահպանելու համար այդ վայրի իսլամական ինքնությունը, տեղեկացնում է «Ինտերնեշնըլ Բիզնես թայմս» թերթը:
Իր ելույթում բուռն թափով հարձակվելով Իսրայելի վրա, նա երկրի ներկա վարչակարգի Արեւմտյան ափի նվաճողական քաղաքականությունը նմանեցրել է Ամերիկայում եւ Հարավային Աֆրիկայում սեւերի հանդեպ իրագործված խտրականությանը եւ զգուշացրել է Թրամփի վարչակազմին Մ. Նահանգների դեսպանատունը Թել Ավիվից Երուսաղեմ չտեղափոխել: «Դա չափազանց սխալ եւ անխոհեմ քայլ կլինի», ասել է նա:
Նրա ելույթը խիստ քննադատության է արժանացել Իսրայելում, որտեղ համարել են, որ «Թուրքիայի հակասական առաջնորդը իրավունք չունի բարոյականություն քարոզելու, քանի որ ինքը համակարգված ձեւով խախտում է մարդու իրավունքներն իր երկրում: Իսրայելը տարածաշրջանի միակ ժողովրդավարական երկիրն է, որտեղ հրեաները, մահմեդականներն ու քրիստոնյաները ունեն պաշտամունքի ազատություն», ասված է կոշտ պատասխանում:
