Ռուսաստանը պատրաստ է Հալեպում օրական 11-ժամյա հրադադարը երկարաձգել մինչեւ երկուշաբթի, հաղորդել է ՄԱԿ-ը երեկ, ըստ գերմանական լրատվամիջոցների: Մոսկվան նույն ձեւով չի հաստատում իր հայտարարությունը: Ռուսաստանի պաշտպանության նախարարությունը չի հաստատում ՄԱԿ- ի հիշյալ հայտարարությունը, եւ ինչպես նախարար Շոյգուն է փոխանցել, Պուտինը 24 ժամով է երկարաձգում հրադադարըՙ մինչեւ ուրբաթ երեկո ժամը 18- ը, ինչին իր համաձայնությունն է տվել Սիրիայի կառավարությունը: ՄԱԿ-ի ցանկությունն է ուրբաթ օրվանից վիրավորներին ու հիվանդներին դուրս բերել սիրիական մահաշունչ այդ քաղաքից:
ԵՄ պետությունների ներկայացուցիչներիՙ Բրյուսելում գումարվելիք երկօրյա գագաթաժողովին Գերմանիան կոշտ, հստակ վերաբերմունք է ակնկալում Ռուսաստանի նկատմամբ: Բեռլինում Պուտինին հանդիպելուց մեկ օր հետո կանցլեր Մերկելը երեկ հորդորել է իր եվրոպացի պաշտոնակիցներին Ռուսաստանի հանդեպ անողոք լինելՙ հայտարարելով, թե «այն, ինչ կատարվում է Հալեպում Ռուսաստանի աջակցությամբ, անմարդկային է»: Մերկելն առաջարկել է աշխատել հնարավորինս արագ Հալեպում տեւական զինդադար հաստատելու ուղիների վերաբերյալ: ԵՄ- ում ոչ բոլորն են համակարծիք, թե Ռուսաստանի դեմ նոր պատժամիջոցներն են Սիրիայում Ռուսաստանի վարած քաղաքականությունը դատապարտելու միակ տարբերակը:
