Ըստ Ստամբուլում լույս տեսնող «Նոր Մարմարա» եւ «Ժամանակ» պարբերականների, նախագահ Էրդողանին ուղղվածՙ Թուրքիո հայոց պատրիարքության ընդհանուր տեղապահ Արամ արք. Աթեշյանի «հավատարմության» նամակը խիստ վրդովմունք է առաջացրել Հայաստանից եւ Սփյուռքից բացի նաեւ Թուրքիայում ապրող հայերի շրջանում: Ստամբուլում, հունիսի 22-ին, Թադեոս Բեբեքի գլխավորությամբ մի խումբ ցուցարարներ դեպի Պոլսո պատրիարքարան են ուղեւորվելՙ պահանջելով անհապաղ անցկացնել նոր պատրիարքի ընտրություն:
«Միտք» ասոցիացիայի հովանավորությամբ անցկացվող հավաքի մասնակիցները նախ պատրիարքարան են մտել, մոմ վառել եւ աղոթք բարձրացրել առ Աստված, ապա «Սեւգի» փողոցի վրա գտնվող պատրիարքարանի դարպասների մոտ սեւ ծաղկեպսակ են զետեղել «Կ ուզենք ընտրել նոր պատրիարք» մակագրությամբ:
Հավաքվածների անունից լրագրող Ժակլին Չելեքը հայտարարություն է կարդացել, որտեղ բացի նոր պատրիարքի ընտրությունից պահանջ է ներկայացվել պատրիարքարանի պաշտոնական իրավական կարգավիճակի մասին:
Թուրքական լրատվամիջոցները ուշի-ուշով հետեւել են իրադարձությանը:
