Թուրքիան Եվրոմիությանը սպառնում է չեղյալ հայտարարել գաղթականների հետ կապված գործարքը: Անկարան չի կատարի համաձայնագրի պայմանները, եթե Բրյուսելը չիրականացնի մինչեւ ս.թ. հունիս Թուրքիայի քաղաքացիներին անայցագիր ռեժիմ շնորհելու սեփական խոստումը: Այդ մասին երեքշաբթի օրը հայտարարել է վարչապետ Ահմեդ Դավութօղլուն:
Ռոյթեր գործակալությունը մեջբերում է վարչապետի այն խոսքերը, որ եթե Եվրոմիությունը չկատարի սեփական պարտավորությունները, ապա «հիմարություն կլինի հույս ունենալ, թե Թուրքիան կկատարի իր պարտավորությունները»:
Մարտի 8-ին Եվրոմիությունն ու Թուրքիան բրյուսելյան գագաթաժողովում համաձայնեցրել էին գաղթականների խնդրի լուծման սկզբունքները: Պայմանավորվածության համաձայն, Անկարան ԵՄ-ից 3 մլրդ եվրո կստանա գաղթականների տեղավորման համար եւ պարտավորվում է իր տարածքում ընդունել Հունաստան եւ ԵՄ այլ երկրներ հասած փախստականների: Դրա դիմաց Թուրքիան ԵՄ-ից պահանջել էր արդեն ընթացիկ գարնանը ապահովել սեփական քաղաքացիների անայցագիր կարճատեւ ուղեւորություններ Եվրոպա: Բացի դրանից, պետք է վերսկսվեին Եվրոմիությանը Թուրքիայի անդամակցության բանակցությունները:
Այցագրերը վերացնելու պահանջը միանշանակ չէր ընկալվել ԵՄ քաղաքական գործիչների շրջանում: Մարտի 17-ին Եվրոխորհրդարանի ղեկավար Մարտին Շուլցը հայտարարել էր, որ խորհրդարանը չի պատրաստվում դյուրացնել այցագրերի վերացման արարողակարգը: Հաջորդ օրը ԵՄ գագաթաժողովում Լյուքսեմբուրգի վարչապետ Քսավիե Բետելը ասել էր, որ Թուրքիան կատարել է այցագրերի վերացման համար անհրաժեշտ 72 պահանջներից միայն 35-ը:
Եվրոմիությունում միգրացիոն ճգնաժամ ծագեց 2015-ին: Փախստականները Էգեյան ծովը հատում են ԵՄ-ում ապաստան գտնելու ակնկալությամբ: Անցյալ տարի ԵՄ է մուտք գործել ավելի քան մեկ միլիոն մարդ, այդ թվում 850 հազարը Հունաստան է հասել Թուրքիայից:
