«Հայաստանի եւ նրա խնդիրների վերաբերյալ բացասաբար տրամադրված երկրների ու կազմակերպությունների շարքը գլխավորում են Ադրբեջանը (92,2%-ը), երկրորդ տեղում Թուրքիան է (90,4%), երրորդըՙ «Իսլամական պետություն» ահաբեկչական կազմակերպությունը (49,1%)»,- երեկ Մանկավարժական պետական համալսարանում տեղի ունեցած ասուլիսի ժամանակ նշեց փիլիսոփայական գիտությունների թեկնածու Հովհաննես Հովհաննիսյանը : Նրա եւ Մանկավարժական համալսարանի փիլիսոփայության եւ տրամաբանության ամբիոնի վարիչ, փիլիսոփայական գիտությունների դոկտոր Հասմիկ Հովհաննիսյանի ղեկավարությամբ իրականացվել է «Հայոց ցեղասպանության երեւույթի ընկալման առանձնահատկությունները եւ հոգեբանական-աշխարհայացքային անդրադարձները հանրային կարծիքում» թեմայով սոցիոլոգիական հետազոտություն:
Աշխատանքային թիմը 2015թ. մարտի 15-ից ապրիլի 15-ն ընկած ժամանակահատվածում իրականացրել է սոցիոլոգիական հետազոտություն. «Հետազոտության նպատակն էր վերհանել Օսմանյան կայսրության իշխանությունների ծրագրած եւ իրականացրած հայոց ցեղասպանության փաստի կապակցությամբ հանրային կարծիքում առկա տրամադրություններն ու դիրքորոշումները, դրա հետեւանքների մեղմման ու վերացման քայլերի վերաբերյալ կարծիքների սպեկտրը»,- ասաց Հովհաննես Հովհաննիսյանը: Սոցիոլոգիական հետազոտությունն իրականացվել է 560 երեւանցիների շրջանում: Գնահատվել են նաեւ տարբեր երկրների ու քաղաքական կառույցների վերաբերյալ հանրային կարծիքը: Հարցվածների համակրանքին եւ դրական վերաբերմունքին արժանացած երկրների թվում առաջինը Ֆրանսիան էՙ 82.5 տոկոսով, երկրորդը ՌԴ-նՙ 73.2, երրորդ հորիզոնականում Իտալիան էՙ 63.8, ապա Հունաստաննՙ 60.7 ու Գերմանիանՙ 56.1:
Ի՞նչ տրամադրություններ եւ զգացումներ է առաջացնում Հայոց ցեղասպանության մասին վերհուշը հարցվողների շրջանում հարցին ի պատասխանՙ Հովհաննես Հովհաննիսյանը ընդգծեց. «Ամենաշատն առաջացնում է ցավը վերապրելու, ապագայի նկատմամբ հավատի եւ հույսի, լավատեսության տրամադրություն (91,2 %), այնուհետեւ բողոքի, ցասման, վրեժխնդրության հատուցման համար պայքարի տրամադրություններ (88,2%) եւ ափսոսանքի, ընկճախտի անկումային տրամադրություններ (76,2 %)»:
Հետազոտության ադյունքում նկատելի է դարձել, որ ցեղասպանության հետեւանքների վերացման տարբերակներից առաջին տեղում է Պատմական Հայաստանի տարածքների վերադարձը Հայաստանինՙ 62,7%, այնուհետեւ հայերի նկատմամբ իրականացված ցեղասպանության փաստի ճանաչումն ու դատապարտումը Թուրքիայի կողմիցՙ 48%, ցեղասպանության զոհերի, նրանց հարազատների ու ժառանգների վերաբնակեցումը պատմական հայրենիքումՙ 27%, Լեռնային Ղարաբաղի Հանրապետության ճանաչումը Թուրքիայի կողմիցՙ 24,6% եւ այլն:
Հայաստանի եւ նրա խնդիրների վերաբերյալ դրականորեն տրամադրված երկրների ու կազմակերպությունների տասնյակումՙ ըստ հարցման մասնակիցների, առաջին հորիզոնականում է Ֆրանսիան ՙ 81,1%, այնուհետեւ Ռուսաստանի Դաշնությունըՙ 68,6%, Հունաստանըՙ 55,0%, Միավորված ազգերի կազմակերպությունըՙ 51,6%, Իտալիանՙ 47,3% եւ այլն:
Հետազոտության մասնակիցներն, ամփոփելով արդյունքները, նկատեցին, որ հանրային կարծիքի ուսումնասիրման արդյունքում ստացած տվյալները չի կարելի ընկալել ու մեկնաբանել որպես փորձագիտական: Սակայն ստացած տվյալներն ավելի խորը փորձագիտական հետազոտությունների ու վերլուծությունների հարուստ նյութ են ՙ հիմք դառնալով տվյալ ոլորտում իրականացվող ծրագրերի ու քաղաքականության կարգավորման եւ արդյունավետության բարձրացման համար:
