Հայաստանի նախկին վարչապետ Տիգրան Սարգսյանը եկող տարվանից Եվրասիական տնտեսական հանձնաժողովի նախագահը կլինի: Այդ մասին ԵՏՄ ղեկավարների հանդիպման ժամանակ հայտնեց Բելառուսի նախագահ Ալեքսանդր Լուկաշենկոն: Ընդ որում, նա շեշտեց, որ Տիգրան Սարգսյանի թեկնածությունը Ռուսաստանի նախագահ Վլադիմիր Պուտինի կողմից է պաշտպանվել: «Ասում են, որ շատ փորձառու եւ առաջադեմ մասնագետ է», նշել է Բելառուսի նախագահը եւ հայտնել, որ փետրվարի 1-ից Հայաստանի նախկին վարչապետը կանցնի իր պարտականությունների կատարմանը:
ԵՏ հանձնաժողովը գրեթե նույն կառույյցն է ԵՏՄ-ի համար, ինչ Եվրոհանձնաժողովը ԵՄ-ի համար: Նրա ղեկավարը, շատ կոպիտ ձեւակերպմամբ, ԵՏՄ կառավարության ղեկավարն է համարվում: Իհարկե լիազորությունների եւ պարտականությունների առումով բազմաթիվ առանձնահատկություններ կան: Բնական է, այս նշանակումը առաջին հերթին դրական է հենց իր` Տիգրան Սարգսյանի համար: Հայաստանի վարչապետի պաշտոնում նրա դեմ ուղղված քարոզչական արշավից եւ որպես հետեւանք` հրաժարականից հետո, նա ապացուցեց, որ մասնագիտական ունակություններն ու հմտությունները աշխարհում գնահատվում են: ԵՄ-Հայաստանի հարաբերությունների խորացման կողմնակից եւ ԵՄ հետ ասոցիացման համաձայնագիրը կարեւորող վարչապետ լինելով, ապա նշանակվելով ՀՀ դեսպան արեւմտյան աշխարհի առաջնորդ համարվող ԱՄՆ-ում, նրա թեկնածությունը պաշտպանել է Արեւմուտքի հետ խորը հակասություններ ունեցող եւ Արեւմուտքի թելադրանքին չենթակվելու համար պատժամիջոցներ կրող երկրի` Ռուսաստանի ղեկավարը: Դժվար թե որեւէ նման օրինակ գտնվի ներկայիս աշխարհաքաղաքական իրավիճակում: Հավանական է, որ Ռուսաստանի նախագահի կողմից Տիգրան Սարգսյանի թեկնածությունը պաշտպանելը կամ տվյալ դեպքում նույնն է թե առաջադրելը պայմանավորված է նրանով, որ այս երկու գործիչները նույն ժամանակահատվածում եղել են իրենց երկրների վարչապետներ եւ քաջածանոթ են միմյանց ունակություններին:
Սակայն այստեղ մեկ այլ հարցադրում էլ է առաջանում. ինչպե՞ս է բացատրվում Հայաստանի Հանրապետության արտակարգ եւ լիազոր դեսպանին այլ պաշտնում նշանակելը մինչ մեր երկիր ղեկավարի կողմից նրան այդ պաշտոնից հետ կանչելը կամ ազատելը: Հասկանալի է, որ մինչեւ փետրվարի 1-ը դա տեղի կունենա եւ ՀՀ նախագահի համապատասխան հրամանագրերը կլինեն: Սակայն, պետական եւ դիվանագիտական էթիկայի առումով ճիշտ կլիներ, որ մինչ այդ որոշվեր դեսպանի պաշտոնից Տիգրան Սարգսյանին այլ աշխատանքի անցնելու կապակցությամբ ազատվելու հարցը: Չենք կարծում, որ ՀՀ նախագահը նրա նշանակման մասին իմացավ այն պահին, երբ այդ մասին հայտարարեց Բելառուսի նախագահը: Այլապես, պետության հեղինակության խնդիր կառաջանար:
Մի խոսքով, Տիգրան Սարգսյանը շուտով կղեկավարի ԵՏ հանձնաժողովը եւ ամենակարեւորը մեր եկրի համար պետք է լինի այն, որ նա, բացի իր պաշտոնական պարտականությունները պատշաճ եւ պրոֆեսիոնալ ձեւով կատարելուց, կարեւորի նաեւ Հայաստանի շահերը ԵՏՄ-ում: Միջազգային որեւէ կառույցում որեւէ երկրի, մասնավորապես փոքր երկրի ներկայացուցիչ նշանակվելուց, վերջինս բացահայտ կամ ոչ բացահայտ պաշտպանում է իր երկրի շահերն այդ կառույցում: Հուսով ենք, որ ՀՀ նախկին վարչապետի պարագայում դա հենց այդպես էլ կլինի:
