ԼՂՀ պաշտպանության բանակի մամուլի ծառայության հաղորդագրությամբ` երեկ, մարտի 19-ին, ժամը 08:30-ի սահմաններում, հակառակորդի հատուկ նշանակության ջոկատի ուժեղացված խումբը հարձակում է ձեռնարկել հյուսիսային (Գյուլիստանի) ուղղությամբ տեղակայված Արցախի դիրքերի վրա: Շուրջ երկու ժամ տեւած մարտական գործողության արդյունքում մեր դիրքապահ անձնակազմը եւ օգնության հասած ուժերը հակառակորդին փախուստի են մատնել, ապա հետեւելով` ոչնչացրել ողջ խմբին իրենց իսկ դիրքերի մատույցներում: Հակառակորդը 12 զոհ ունի, որոնց մի մասը ականի պայթյունից են մահացել: Ցավոք` հայկական կողմը նույնպես ունի 3 զոհ եւ 4 վիրավոր:
Հայտնի են դարձել զոհված զինծառայողների անունները` Հակոբ Գագիկի Խաչատրյանը ԼՂՀ-ի Քաշաթաղի շրջանից, Արշակ Կարենի Հարությունյանը Էրեբունի վարչական շրջանից, Էդուարդ Գագիկի Հայրապետյանը` Աշտարակից: 4 զինծառայող տարբեր հրազենային վնասվածքներ են ստացել: Երկու վիրավորի վիճակը կայուն ծանր է, իսկ երկու զինծառայողի կյանքին վտանգ չի սպառնում, նրանք հոսպիտալացվել են: ԼՂՀ պաշտպանության նախարարությունը կիսում է ծանր կորստյան ցավը եւ ցավակցում զոհված զինծառայողների ընտանքիներին: Մենք բոլորս ենք կիսում այդ ցավը:
ԼՂՀ նախագահի մամլո խոսնակ Դավիթ Բաբայանի խոսքով` հակառակորդն արդեն մի քանի օր ինտենսիվ կրակով խախտում էր հրադադարի ռեժիմը, որի գագաթնակետը նախորդ գիշեր եւ երեկ առավոտյան էր, երբ հատուկ նշանակության բավական մեծ ջոկատը դիվերսիոն ներթափանցման փորձ է արել եւ հակահարված ստանալով` հետ շպրտվել: Երեւի ադրբեջանցիք Նովրուզի տոնն այդպես են փորձել նշել, թեեւ կրոնական այդ տոնը արյան հետ կապ չունի:Նովրուզի տոնի առթիվ ելույթ ունեցած Իլհամ Ալիեւի հնչեցրած սպառնալիքները, փաստորեն, ավարտվել են մի ողջ դիվերսիոն խմբի ոչնչացմամբ:
