«Russia Times» պարբերականի հաղորդմամբ Ստամբուլի N1 քրեական գործերի դատարանը ընդունել է Ստամբուլի գլխավոր դատախազի գրասենյակից ստացված պահանջագիրը եւ Ֆեթհուլլահ Գյուլենին ձերբակալելու կարգադրություն հրապարակել, մեղադրելով նրան «ահաբեկչական» խումբ ստեղծելու եւ ղեկավարելու մեջ: Հիշեցնենք, որ դեկտեմբերին մամուլի մի շարք պաշտոնյաներ, ներառյալ խմբագիրներ, ձերբակալվել էին, որպես Գյուլենին պաշտպանող կասկածյալներ: Նախագահ Էրդողանը Գյուլենին մեղադրել է դավադրաբար պետական հեղաշրջում կազմակերպելու մեջ երդվել է «ջախջախել չարակամ ուժերին», որոնք կապ ունեն Գյուլենի ղեկավարած «Հիզմետ» կրոնա-հասարակական շարժման հետ: Իսկ վարչապետ Դավութօղլուն նշել է, որ Անկարան կարող է Ինտերպոլին խնդրել Գյուլենին արտահանձնման իրավունք հրապարակել: «Նրան կվերաբերվենք ինչպես որեւէ այլ թուրք քաղաքացու», ասել է նա ասուլիսի ժամանակ, ըստ «Դեյլի Սաբահ» թերթի:
Նախքան Մ. Նահանգներ տեղափոխվելը 1999-ին Գյուլենը Էրդողանի մտերիմ դաշնակիցներից էր: Խզումը առաջացավ, երբ Գյուլենի ազդեցությունն ու հեղինակությունը սկսեց մեծանալ աշխարհով մեկ նրա հիմնադրած իսլամական-կրոնական կրթական կենտրոնների եւ բարգործական կազմակերպությունների շնորհիվ:
Գյուլենին Ստամբուլում դատել եւ մեղավոր էին ճանաչել 2000 թվին, իսկ 2008-ին արդարացրել բոլոր մեղադրանքներից:
