Ի՞նչ է նշանակում որեւէ մեկին ինչ-որ հարցով դատի տալ այն երկրում, որի քաղաքացին չենք: Անշուշտ նշանակում է, որ մենք կա՛մ վստահում ենք տվյալ երկրի դատարանին, կա՛մ հույս ունենք, որ այդ դատարանը կիրականացնի արդարադատությունը, ինչը մեզ համար նշանակում է մեր պահանջի ամբողջական բավարարում: Բայց բացի այս ամենից եւ տվյալ պարագայում ամենագլխավորը` ի՞նչ է նշանակում որեւէ մեկին ինչ-որ հարցով դատի տալ այն երկրում, որի քաղաքացին չենք: Նշանակում է, որ մենք ճանաչում ենք այն երկրի դատարանը, որին էլ դիմում ենք արդարադատություն ստանալու պահանջով:
Իսկ ի՞նչ է նշանակում ճանաչել ինչ-որ երկրի դատարանը որպես այդ երկրի տարածքում արդարադատությունն իրականացնող միակ մարմին: Ի թիվս այլ բաների,սա նշանակում է նաեւ, որ մենք ճանաչում ենք տվյալ երկիրը որպես անկախ գործող իրավական սուբյեկտ: Այսինքն եթե, ենթադրենք, ՀՀ քաղաքացին ինչ-որ հարցով, ինչ-որ մեկին դատի է տալիս Աբխազիայում, կամ Հարավային Օսիայում, համապատասխանաբար` աբխազական կամ հարավօսական դատարաններ, սա նշանակում է, որ ՀՀ տվյալ քաղաքացին ճանաչում է այդ դատարանների իրավազորությունը, հետեւաբար` Աբխազիան եւ Հարավային Օսիան` որպես անկախ պետություններ:
Նույնը վերաբերում է բոլոր այն դեպքերին, երբ ինչ-որ այլ երկրի քաղաքացի ոչ թե դատի է տալիս օտար երկրում մեկ այլ քաղաքացու, այլ տվյալ երկրի` վերադաս դատարանում բողոքարկում է իր հանդեպ կայացրած ստորադաս դատարանի դատավճիռը: Այսինքն, ենթադրենք Կոսովոյի դատարանը ՀՀ քաղաքացուն արդեն իսկ դատապարտել է, օրինակ, 6 տարի ազատազրկման` ապացուցված համարելով նրա հանդեպ եղած մեղադրանքը, եւ երբ տվյալ քաղաքացին բողոքարկում է այդ դատավճիռը Կոսովոյի Վերաքննիչ դատարանում, կնշանակի, որ նա ճանաչում է Կոսովոյի դատարանը, հետեւաբար` Կոսովոյի անկախությունը:
«Արցախպրես»-ի հետ զրույցում Արցախի Հանրապետության սահմանն ապօրինաբար հատած ադրբեջանցի դիվերսանտներ Դիլհամ Ասկերովի եւ Չինգիզ Գուլիեւի փաստաբաններ Էրիկ Բեգլարյանն եւ Արկադի Իսրայելյանը հայտարարել են,որ իրենց պաշտպանյալները մտադիր են բողոքարկել Արցախի դատարանի` իրենց հանդեպ կայացրած դատավճիռները (համապատասխանաբար` ցմահ եւ 22 տարի ազատազրկում) Արցախի Վերաքննիչ դատարանում:
Թե ի՞նչ է սա նշանակում, արդեն գիտենք:
