Խոսքը, պատկերն ու ձայնն անդիմադրելի ազդեցություն ունեն. դեռ անտիկ փիլիսոփաներն են դրանում համոզվել ու խորհուրդներ տվել կայսրերին: Դա է պատճառը, որ արքաներն ու զավթիչները հասարակության վրա իշխելու համար խոսքի արվեստին տիրապետող հռետորներ են ունեցել իրենց կողքին, ստեղծել են ազդեցիկ, վախ ներշնչող զինանշաններ:
Հայաստանի առաջին հանրապետության զինանշանը ստեղծեցին Ալեքսանդր Թամանյանն ու Հակոբ Կոջոյանը: Մերօրյա մասնագետներն այն համարում են գեղագիտորեն ոչ հաջողված, վատ մշակված զինանշան:
1991-ին Հայաստանի նորանկախ Հանրապետությունը հաստատեց նոր զինանշան: Այն հիմնված էր Թամանյանի եւ Կոջոյանի հեղինակած պետական խորհրդանիշի վրա, սակայն Ռուբեն Ղեւոնդյանը բավականաչափ աշխատել էր, գեղարվեստական նոր լուծումներ տվել, ակնհայտ փոփոխություններ կատարել:
Մասնագետներըՙ հատկապես նկարիչները, բազմաթիվ անգամներ նկատել են, որ ՀՀ պետական զինանշանը կիրառվում է աղավաղված: Առյուծը, վագրը, արծիվներ ոչ միայն հստակ չեն գծված, այլեւ հաճախ մանկական ձեռքով խզբզված պատկերներ են հիշեցնում: Այս փաստերն արձանագրել է «Մենք» ազգային արժեքների պահպանման հիմնադրամը, որը համագործակցում է նկարիչների ու դիզայներների հետ: Նկարիչների միության նախագահ Կարեն Աղամյանի ու նկարիչ, դիզայներ Հարություն Սամուելյանի նշած օրինակներում զինանշանի աղավաղումներն ակնբախ են ու վրդովեցնող: Նախՙ զինանշանի աջ կողմում գտնվող առյուծն ի սկզբանե բաց երախով էր, լեզուն հանածՙ պատրաստ հոշոտելու ախոյանին: Իսկ շրջանառվող զինանշաններում առյուծը փակ երախով է ու սառած հայացքով: Սուրը, որ վահանի հետեւում է, չգիտես ինչու, կիսատ է, շեղբն ու ծայրը չկան, իսկ կոթի հատվածը շղթայված է. այսինքնՙ սրանով ասվում է, որ մեր սուրն իբրեւ թե կա, բայց իրականում չկա, մենք անզեն, անուժ, ինքներս մեզ պաշտպանելու անունակ պետություն ենք: Վահանի վրա պատկերված թագավորական 4 հարստությունների խորհրդանիշերը եւս աղարտված են: Բագրատունիների վագրի բերանն իրականում պետք է բաց լինի, այնինչ մի անդեմ կատու է հիշեցնում: Արտաշիսյանների երկու արծիվնեըՙ մեջտեղումՙ արեւ, դարձյալ սխալներով է պատկերված: Արծիվներն ասես աղավնիներ լինեն, իսկ մեջտեղում շողացող արեւի ճառագայթներն առնված են օղակի մեջ: Այս խորհրդանիշն, ի դեպ, վերցված է Տիգրան Մեծի սաղավարտից: Արշակունիների երկգլխանի արծիվներն ինչ անմեղսունակ թռչնի ասես կարելի է նմանեցնել, բացի արծվից: Սարասափելի է Կիլիկիո թագավորության խորհրդանիշի վիճակը: Առյուծըՙ թագը գլխին, մանկական խաղալիքի պատկերով փիսո է հիշեցնում:
Յուրաքանչյուր քաղաքակիրթ պետություն նման զանցանքի համար քրեական պատասխանատվության կենթարկեր պետական խորհրդանշանն աղավաղողին: Սակայն անգամ պետական կառույցներն իրենց կայքերում երկար ժամանակ գործածել են խեղաթյուրված զինանշաններն, ու ոչ ոք ուշադրություն չի դարձրել: «Մենք» ազգային արժեքների պահպանման հիմնադրամը հետեւողականորեն տեղեկացրել է բոլորին, հորդորել փոխել խեղաթյուրված զինանշաններն ու նրանց է տրամադրել պետականորեն հաստատված տարբերակը: Հիմնադրամը դիմել է ՀՀ նախագահի աշխատակազմին, ԱԺ-ին, կառավարությանը, որպեսզի ստեղծվի պետական կառույցՙ խորհուրդ, որը կզբաղվի պետական խորհրդանիշերի խնդիրներով ու դրանց կիրառման վերահսկողությամբ: 2010 թվականից առ այսօր որեւէ պատասխան չի ստացվել:
Մասնագետները վստահ են, որ նման աղավաղումները պատահականություններ չեն, այլ արվում են մտածված ու ծրագրված: Ոչ մարտունակ ու ոչ ռազմատենչ միտումներով զինանշանը տկարի, խեղճի հոգեբանություն է ներարկում հանրությանը: Մինչդեռ հատկապես այսօր մենք ռազմական ոգին բարձրացնող արժեքներիՙ խոսքի, անգամ առյուծի բաց երախով պատկերի կարիքն ունենք: Զինանշանի պատկերներն ավելի շուտ հիշեցնում են ընտանի կենդանիների ու թռչունների ծաղրանկարներ, եւ դա անում ենք մենքՙ ինքներս մեր ձեռքովՙ ծաղրելով մեր արժեքները:
