Մ. Խ. ԲԱՐՔԵՐ
Երեկ zham.am կայքին տված հարցազրույցում ԲՀԿ առաջնորդ Գագիկ Ծառուկյանն ինքն է անդրադարձել հոկտեմբերքսանչորսյան իր ելույթիի ուղերձներին, փաստորեն լրացուցիչ պարզաբանումների կարիք զգալով: Նա ասում է, որ Հայաստանի տնտեսական վիճակը ծանր է, օրեցօր վատանում է ժողովրդի սոցիալական վիճակը, որ` պաշտոնական թվերով 32 տոկոս աղքատությունն իրականում ողբերգություն է, ու մենք երկար ժամանակ չունենք, հարկավոր են արագ ու խորքային լուծումներ: Դատարկ խոստումներին այլեւս ոչ ոք չի հավատում, եւ եթե անորոշությունն ու հետընթացը շարունակվեն` երկիրը կդադարի տարածաշրջանում մրցունակ լինել, հետեւանքներով հանդերձ:
Բացատրելով նոր որակի իշխանության անհրաժեշտության մասին իր ասածի բովանդակությունը, նա ասում է, որ պետք է կոտրել քաղաքական մենաշնորհը, որ բերում է տապալման եւ հետընթացի, իսկ տնտեսության մեջ էլ պետք է գնալ այնպիսի քայլերի, որոնք շատ արագ կաշխուժացնեն տնտեսությունը եւ կփոխեն երկրի մթնոլորտը: Եւ քայլեր է նշում` փոքր բիզնեեսը պետք է ազատվի բոլոր հարկերից մի քանի տարով, միջին բիզնեսի համար պետք է բացառիկ հնարավորություններ ստեղծվեն, որ այդ խավը շտկի դրությունն ու դուրս գա ճգնաժամից, դա էլ կաշխուժացնի տնտեսությունը:
Ուշադրություն` Ծառուկյանն ասում է նաեւ, որ Հայաստանում պետք է վերանա բռնի ուժով փայ մտնելու ավանդույթը.չպետք է լինեն մենաշնորհներ, ապրանքները ոչ թե 10-20 հոգի ներկրեն, այլ` որքան թույլ կտա շուկան: ՀՀ-ն պետք է բարձր տեխնոլոգիաների եւ արդյունաբերական երկիր դառնա, ամեն մարզում պետք է ձեւավորել հարկային արտոնություններով օժտված մեկ արդյունաբերական գոտի, վերջնական արդյունք արտադրող երկիր պետք է ունենալ, եւ ոչ թե հումք կամ կիսաֆաբրիկատ արտահանող: Եւ որ` օդի նման անհրաժեշտ օտարերկրա խոշոր ներդրող չկա, քանի որ երկրի հանդեպ վստահություն չկա, սա է ուզում փոխել Ծառուկյանը: Վահ, սիրտս ծակեց, այնքան որ մեր ցանկություններին համահունչ բաներ է ասել:
ԲՀԿ առաջնորդն ասում էր նաեւ, որ երկրի ներսում իր կուսակցությունը չունի թշնամիներ, անկախ քաղաքական փոփոխություններից պետական համակարգը պետք է նորմալ մթնոլորտում աշխատի եւ իրեն պաշտպանված զգա: Սփյուռքի ներուժը ճիշտ պետք է օգտագործվի, ռեալ աջակցություն ստանա գյուղը:
Իսկ հարցազրույցի վերջում հավաստիացնում է, թե գնալու է այնքան, մինչեւ Հայաստանում իրավիճակ փոխվի, մինչեւ տնտեսությունը վերականգնվի, եւ Հայաստանը նորից սկսի շնչել. «Այնպես որ այդ հեքիաթը վաղուց սպառվել է, թե` մինչեւ ուր կգնա Ծառուկյանը: Ես հետդարձի ճանապարհ չունեմ», իրեն քննադատողներին եւ չհավատացողներին հավաստիացնում է Գագիկ Ծառուկյանը:
Դե ինչ, գուցե այս հարցազրույցում իրոք որոշ ծրագրային ուղերձ կա, որ նորություն է, ձեւակերպումներն էլ հրաշալի են, խոսք չունենք, որոնք մշտապես բարձրացրել է եւ մամուլը, եւ ընդհանրապես` Հայաստանով մտահոգվողները: Մնում է շաաա~տ քիչ բան` դրանք իրագործել, չհավատացողների ջգրու: Մեր անհավատության վերջն էլ գուցե այդ ժամանակ գա: Թե չէ` գեղեցիկ խոսքեր շատ ենք լսել, ու միշտ դրանց հավատալ-չհավատալը կախված է եղել նրանից, թե ո՞վ է ասողը, ո՞ւմ կյանքն ու գործն են բռնում խոսքերին:
