Համաշխարհային բանկի երեւանյան գրասենյակից տեղեկացանք, որ Հայաստանը բարելավել է իր դիրքերը ՀԲ Doing Business 2015-ի (Գործարարություն 2015) բիզնեսի վարման դյուրինության վարկանշային սանդղակում: Մասնավորապես, Հայաստանը 2014թ.-ի 49-րդ վարկանշային դիրքից 2015թ.-ին տեղափոխվել է 45-րդ վարկանշային դիրքը 189 երկրների մեջ: Այս առաջընթացը հնարավոր է եղել շնորհիվ մեր երկրում բիզնես սկսելը դյուրացնելուՙ գրանցմանը հաջորդող ընթացակարգերի կատարելագործման միջոցով: Հայաստանի հետհաշվարկված դիրքը սահմանային միավորի առնչությամբ 2014-ին կազմում էր 69,3 միավոր: 2015-ին բարելավվել է 1,3 նիշով, կազմելով 70,6 միավոր:
Մեր տարածաշրջանում բիզնես վարելու ամենաբարձր վարկանիշն ունի Վրաստանը, որն աշխարհի 189 տնտեսությունների շարքում 15-րդն է (2014-ինՙ 14-րդը): Ադրբեջանը 80-րդն է` 2014-ի 88-րդ դիրքի փոխարեն:
Համաշխարհային բանկի Doing Business 2015-ի (Գործարարություն 2015) «Արդյունավետությունից անդին» զեկույցի համաձայն, բիզնեսի վարման դյուրինության վարկանշային սանդղակը գլխավորում է Սինգապուրը, որին հաջորդում են Նոր Զելանդիան, Հոնգ Կոնգը (հատուկ վարչական շրջան), Չինաստանը, Դանիան, Կորեայի Հանրապետությունը, Նորվեգիան, ԱՄՆ-ն, Մեծ Բրիտանիան, Ֆինլանդիան եւ Ավստրալիան:
