Կոպենհագենում` «B&W Hallerne» արենայում մայիսի 6-ին եւ 8-ին տեղի կունենա «Եվրոտեսիլ» երգի մրցույթի կիսաեզրափակիչ փուլերը, իսկ ահա մայիսի 10-ին` եզրափակիչը:
Այս տարի, ինչպես արդեն գիտենք, Հայաստանը ներկայացնելու է Արամ MP3-ին` «Not alone» (Դու մենակ չես) խորագիրը կրող երգով:
Ուրախությամբ պետք է նշենք, որ «Եվրոտեսիլ»-ի այս տարվա հայաստանյան տեսահոլովակը համացանցում տարածում գտավ միանգամից. այն մրցույթի youtube-յան ալիքում դիտումների քանակով առաջինն է` 5 օրում ավելի քան 750 հազար դիտում ցուցանիշով: Բացի այդ, միջազգային բուքմեյքերական ընկերություններ, ամենատարբեր վարկանշային կայքեր առաջին հորիզոնականում տեսնում են հենց Հայաստանի պատվիրակին:
«Եվրոտեսիլի» հայաստանյան պատվիրակության նախագահ Գոհար Գասպարյանն անդրադառնալով մեր մասնակցին ասաց. «Այս տարիներին սա այն եզակիներից է, որ հաղթանակի շունչը զգում ենք, չնայած վաղ է գուշակություններ անել: Այսօր եմ վերադարձել Կոպենհանգենից, որտեղ կայանում էր պատվիրակությունների ղեկավարների ժողովը, որտեղ եւս նշում էին, որ մենք մեծ շանսեր ունենք հաղթելու մրցույթում»:
Ի դեպ, հայաստանյան երգին մրցակից են Նորվեգիայի, Շվեդիայի եւ Հունգարիայի ներկայացուցիչների երգերը:
Արամ MP3-ին շուտով կսկսի պրոմոտուրերը, ինչպես Ռուսաստանի Դաշնությունում, այնպես էլ Եվրոպական տարբեր երկրներում:
Երգչի խոսքերով, ամեն ինչ անելու են, որպեսզի ներկայացնեն նաեւ հետաքրքրական շոու:
Անդրադառնալով «Not alone» երգին, որն ի տարբերություն շատ ու շատ երգերի, չունի կրկներգ, Արամը պատասխանեց. «Աշխարհում կան մի շարք համաշխարհային ճանչում ունեցող երգեր, որոնք ունեն միայն սկիզբ, զարգացում եւ ավարտ ու չունեն կրկներգ: Եթե երգը լիներ պարային, ապա այդ դեպքում հնարավոր է վիճահարույց լիներ կրկներգի բացակայությունը, սակայն ոչ այս դեպքում»:
Ապրիլի 5-ին` Արամ MP3-ի ծննդյան օրն Ամստերդամում կկայանա նրա համերգը, ապա ապրիլի 6-ին նա կմասնակցի Armenian music awords-ին, իսկ ապրիլի 16-ին` Լոնդոնում կայանալիք համերգին:
Ի դեպ, «Եվրոտեսիլին» այս տարի մասնակցում է 37 երկիր եւ գերակշռում են բալլադային երգերը:
Արամ MP3-ին անդրադառնալով իգացած տղային` Կոնչիտա Վուրստին, որի հետ մեկ բեմում պետք է հանդես գա, կես-կատակ, կես-լուրջ ասաց. «Ինձ համար բավականին ծանր է նրա հետ նույն բեմում հանդես գալը եւ պետք է փորձեմ հաղթահարել հոգեբանական խնդիրը: Ի դեպ, ես նույնիսկ Կոմայգու կողքով մեքենայով անցնելիս արագ եմ վարում»:
Արամ MP3-ում դուր է եկել Հունգարիայի մասնակցի երգը, որին էլ մրցակից է համարում:
Նշենք, որ «Not alone» երգի հեղինակը Արամ MP3-ին է, խոսքերի հեղինակը` Գարիկ Պապոյանը: Երգի գործիքավորումը կատարել է Լիլիթ Նավասարդյանը, իսկ տեսահոլովակի ռեժիսորը Գրիգոր Գասպարյանն է:
Հաջողություն ենք մաղթում Արամ MP3-ին…
