ԱՄՆ Ազգային անվտանգության գործակալության (ԱԱԳ) եւ Կենտրոնական հետախուզական վարչության (ԿՀՎ) նախկին աշխատակից Էդվարդ Սնոուդենը «Վաշինգտոն փոստ» թերթին տված հարցազրույցում հայտարարել է. «Ինձ համար, անձնական բավարարվածության իմաստով, առաքելությունն արդեն ավարտված է: Ես արդեն հաղթել եմ»:
ԱԱԳ տասնյակհազարավոր գաղտնի փաստաթղթերի հրապարակման կապակցությամբ նա մասնավորապես հայտարարել է. «Ես չէի ուզում փոխել հասարակությունը: Ուզում էի հասարակությանը ընձեռել իրեն փոխելու հնարավորություն»:
Թերթի աշխատակից Բարտոն Գելմանի հետ զրուցելիս Սնոուդենը խոստովանել է, որ ամերիկյան հատուկ ծառայությունների գործունեությանն առնչվող նյութերը հրապարակելիս ինքը գործել է «կուրորեն» եւ վստահ չի եղել, թե կարժանանա հասարակական լայն աջակցության: Այդուհանդերձ, Սնոուդենի խոսքերով, ինքը կնախընտրեր «փորձել ինչ-որ բան անել, քան ոչինչ չանել»:
ԱԱԳ մյուս աշխատակիցների նման Սնոուդենը ժամանակին ստորագրել է այսպես կոչված «ձեւ 312», այսինքնՙ գաղտնի տվյալներ չհրապարակելու պարտավորագիր: Ընդսմին նա հայտարարում է, որ ինքը գաղտնիք պահելու երդում չի տվել. երդվել է միայն երկրի սահմանադրության առջեւ:
«Ես չեմ փորձում հաղթել ԱԱԳ-ին, այլ աշխատում եմ ԱԱԳ-ի բարելավման ուղղությամբ: Հենց հիմա էլ շարունակում եմ աշխատել ԱԱԳ-ի համար: Սակայն նրանք դա չեն հասկանում», ասել է Սնոուդենը իր հարցազրույցում:
