1962 թ. Եթովպիայում ՀԱՀ ապագա առաջին սեւամորթ նախագահ Նելսոն Մանդելային մարզել, ձեռնամարտի հնարքներ եւ դիվերսիոն աշխատանքի մեթոդներ են սովորեցրել իսրայելական հետախուզությանՙ «Մոսսադի» գործակալները: Այդ են վկայում օրերս Իսրայելի հրապարակած արխիվային փաստաթղթերը, գրում է հարավաֆրիկյան Mail&Guardian հրատարակությունը:
«Մոսսադի» աշխատակիցներից մեկը 1962 թ. հոկտեմբերի 11-ին Իսրայելի ԱԳՆ ուղարկած «Սեւամորթ հերոսը» վերնագրով նամակում մեջբերում է այն զրույցի սղագրությունը, որի մասնակիցները քննարկել էին Եթովպիայում պատրաստություն անցնող ռոդեզիացի ոմն Դեւիդ Մոբասարիի հարցը:
Հոդվածում պարզաբանվում է, որ «Սեւամորթ հերոսը» մականուն է, որ այն տարիներին կրում էր հակաապարթեիդյան պայքարի հայտնի մարտիկ, ANC ռազմականացված խմբավորման նախկին պարագլուխ Մանդելան:
Տվյալ պատմությունն առաջինը հրապարակած իսրայելական «Հաարեց» թերթը իր հերթին պնդում է, որ նամակում օգտագործված «եթովպացիներ» տերմինը, դատելով ըստ ամենայնի, եղել է Եթովպիայում «Մոսսադի» գործակալների պայմանական անվանումը:
«Նա մեր մարդկանց ողջունում է եբրայերեն «շալոմ» բառով, ծանոթ է հրեական սփյուռքի ու Իսրայելի խնդիրներին եւ կրթված մարդու տպավորություն է թողնում: Եթովպացիները փորձում են նրան դարձնել սիոնիստ»ՙ ահա Մանդելային ինչպիսի բնութագիր էր տրված այդ նամակում:
Արխիվային փաստաթղթերի համաձայն, Մանդելային հետաքրքրել են Իսրայելի ստեղծումից առաջ «Խագանայի» մարտիկների եւ հրեական ինքնապաշտպանության ջոկատների կիրառած պայքարի մեթոդները:
Նելսոն Մանդելայի հիմնադրամը արդեն հայտարարել է, որ Մանդելայի անձնական արխիվներում չեն հայտնաբերվել իսրայելցի օպերատիվ աշխատողների հետ համագործակցության վկայություններ: Հիմնադրամի ղեկավարությունը պնդում է, թե ՀԱՀ հանգուցյալ նախագահը ռազմական գործ սովորել է Մարոկկոյում ալժիրյան դիմադրության շարժման մարտիկներից, ինչպես նաեւ Ադիս-Աբեբայումՙ եթովպական ապստամբական գումարտակում:
