ՈւԵՖԱ-ի գործադիր կոմիտեն հաստատել է ֆուտբոլի 2016-ի Եվրոպայի առաջնության ընտրական մրցաշարի անցկացման կանոնակարգը: Ինչպես հայտնի է, 2016-ից սկսած Եվրոպայի առաջնության եզրափակիչ փուլում 16-ի փոխարեն հանդես են գալու 24 հավաքականներ: Դա զգալիորեն մեծացնում է եզրափակիչի ուղեգիր նվաճելու Հայաստանի հավաքականի հնարավորությունները:
2014-ի փետրվարի 23-ին Ֆրանսիայի Նիցա քաղաքում կայանալիք վիճակահանությամբ եվրոպական 53 հավաքականները կբաժանվեն 9 խմբի: 8 խմբերից յուրաքանչյուրում կլինեն 6-ական հավաքականներ, մեկումՙ 5: Քաղաքական նկատառումներից ելնելով ընտրական միեւնույն խմբում չեն ընդգրկվի Հայաստանն ու Ադրբեջանը, Ռուսաստանն ու Վրաստանը, Իսպանիան եւ Ջիբրալթարը:
Ընտրական մրցաշարի արդյունքներով խմբերում 1-ին եւ 2-րդ տեղերը զբաղեցրած հավաքականները, ինչպես նաեւ 3-րդ տեղ գրաված հավաքականների մեջ լավագույն արդյունքի հասած ընտրանին Եվրոպայի առաջնության եզրափակիչ փուլի ուղեգիր կնվաճեն: Մյուս 4 ուղեգրերը անցումային խաղերում կվիճարկեն 3-րդ տեղը գրաված մնացած 8 հավաքականները, որոնք վիճակահանությամբ զույգեր կկազմեն: Առաջնության կազմակերպիչ Ֆրանսիայի հավաքականն առանց ընտրական մրցաշարի իրավունք ունի մասնակցելու եզրափակիչ փուլին:
Արդեն հայտնի են 6 զամբյուղների կազմերը, որոնցում տեղաբաշխվել են հավաքականներըՙ հաշվի առնելով ՈւԵՖԱ-ի վարկանիշային աղյուսակում գրաված դիրքը: Հաշվի են առնված 2010-ի աշխարհի առաջնության ընտրական եւ եզրափակիչ փուլում, 2012-ի Եվրոպայի առաջնության ընտրական եւ եզրափակիչ փուլում, 2014-ի աշխարհի առաջնության ընտրական մրցաշարում հավաքականների ցույց տված արդյունքները:
Հայաստանի հավաքականն իր վարկանիշով ընդգրկվել է 4-րդՙ D զամբյուղում: Այստեղ են նաեւ Լեհաստանի, Շոտլանդիայի, Ֆինլանդիայի, Լատվիայի, Ուելսի, Բուլղարիայի, Էստոնիայի եւ Բելառուսի հավաքականները, որոնցից ոչ մեկի հետ ընտրական մրցաշարում մեր ընտրանին չի կարող հանդիպել:
Վիճակահանության ժամանակ յուրաքանչյուր խմբում ընդգրկվելու է յուրաքանչյուր զամբյուղից մեկական հավաքական: Ահա մնացած զամբյուղների կազմը:
A. Իսպանիա, Գերմանիա, Հոլանդիա, Իտալիա, Անգլիա, Պորտուգալիա, Հունաստան, Ռուսաստան, Բոսնիա:
B. Խորվաթիա, Ուկրաինա, Շվեդիա, Դանիա, Շվեյցարիա, Բելգիա, Չեխիա, Հունգարիա, Իռլանդիա:
C. Սերբիա, Թուրքիա, Սլովենիա, Իսրայել, Նորվեգիա, Սլովակիա, Ռումինիա, Ավստրիա, Չեռնոգորիա:
E. Իսլանդիա, Հս. Իռլանդիա, Ալբանիա, Լիտվա, Մոլդովա, Մակեդոնիա, Ադրբեջան, Վրաստան, Կիպրոս:
F. Լյուքսեմբուրգ, Ղազախստան, Լիխտենշտեյն, Ֆարերներ, Մալթա, Անդորրա, Սան Մարինո, Ջիբրալթար:
Որոշակիորեն փոխվել է ընտրական մրցախաղերի խաղացանկը: Եթե նախկինում ընտրական մրցախաղերը բոլոր խմբերում հիմնականում տեղի էին ունենում ուրբաթ եւ երեքշաբթի օրերին, ապա այժմ խաղերը կայանալու են հինգշաբթիից մինչեւ հաջորդ երեքշաբթի: Այսինքն, յուրաքանչյուր օր տեղի են ունենալու 3 խմբերի ընտրական հանդիպումներ, ինչը հնարավորություն կտա ֆուտբոլասերներին գրեթե մեկ շաբաթ ամեն օր հետեւելու ընտրական խաղերին: Այն հավաքականները, որոնք ընտրական առաջին խաղը կանցկացնեն հինգշաբթի օրը, հաջորդ հանդիպումը կանցկացնեն կիրակի օրը: Որոշ խմբերում 2 տուրերի խաղերը կանցկացվեն ուրբաթ եւ երկուշաբթի, մյուսներումՙ շաբաթ եւ երեքշաբթի օրերին: Այսպիսով, ֆուտբոլասերները հնարավորություն կունենան հանգստյան օրերին եւս հետեւելու ընտրական մրցախաղերին:
