«Կարին» ավանդական երգի-պարի խմբի նախաձեռնությամբ եւ «Թեքեյան կենտրոն» հիմնադրամի աջակցությամբ դեկտեմբերի 20-ից կմեկնարկի նոր նախագիծՙ «ՀԱՅՈՒ ՏԵՍԱԿ» խորագրով, հայագիտական դասախոսությունների շարքը:
Մշակութային արժեքների պահպանությանն ու տարածմանն ուղղված իր գործունեությամբ հայտնի «Կարին» ավանդական երգի-պարի խումբն այս նախաձեռնությամբ նպատակ ունի նպաստել հայ երիտասարդության շրջանում ազգային ինքնաճանաչողության բարձրացմանն ու մշակութային բարձր ճաշակի ձեւավորմանը:
Համաձայն նախագծի ձեւաչափիՙ յուրաքանչյուր ամիս կկազմակերպվի մեկական հանրամատչելի դասախոսություն հայագիտական որեւէ թեմայով: Դասախոսելու համար կհրավիրվեն կրթության, մշակույթի, գիտության, ռազմական եւ հոգեւոր ոլորտների լավագույն մասնագետներՙ ներկայացնելու հայի դիմագիծը, դրսեւորման առանձնահատկություններն ու նվաճումներն այս բնագավառներից յուրաքանչյուրում:
«Կարին» ավանդական երգի-պարի խմբի հիմնադիր, ՀՀ մշակույթի վաստակավոր գործիչ Գագիկ Գինոսյանի կարծիքովՙ նման դասախոսություններն առաջնային կարեւորություն ունեն երիտասարդ սերնդին ազգային գաղափարախոսության հենքի վրա կրթելու, դաստիարակելու, ռազմահայրենասիրական ոգի սերմանելու գործում:
«ՀԱՅՈՒ ՏԵՍԱԿ» շարքի առաջին դասախոսությունը, որը կվարի պարագետ Գագիկ Գինոսյանը, տեղի կունենա այսօր, դեկտեմբերի 20-ին, ժամը 19:00, Թեքեյան կենտրոնում:
Այս եւ առաջիկա բոլոր դասախոսությունների մուտքն ազատ է:
