Ահաբեկչություն Դամասկոսում
Սիրիացի ապստամբների խոշորագույն խմբավորումներից մեկըՙ «Թաուհիդ բրիգադը», նոյեմբերի 18-ին հայտարարել է իր հրամանատար Աբդուլ-Քադիր Սալեհի սպանության մասին:
Սպանվածի զինակիցները Ասոշիեյթեդ պրես գործակալության թղթակցին պատմել են, որ նա մահացել է Հալեպի նահանգում ավիառումբի պայթյունի հետեւանքով ստացած բեկորային վերքերից;
Ֆրանսպրես գործակալության տվյալներով, ծանր վիրավորված հրամանատարին հասցրել են Թուրքիայում գտնվող հիվանդանոց, սակայն, չնայած բժիշկների ջանքերին, նա մահացել է:
Սալեհի փոխարեն բրիգադի հրամանատար է նշանակվել Աբդուլ-Ազիզ Սալամեհը, որը մինչեւ վերջերս բրիգադի ստորաբաժանումներից մեկի հրամանատարն էր:
Սալեհի մահը վերջին մեկ շաբաթվա ընթացքում ապստամբների երրորդ լուրջ կորուստն է Հալեպում: Մի քանի օր առաջ այնտեղ սպանվել էին «Թաուհիդ բրիգադի» ֆինանսիստ Յուսեֆ ալ Աբբասը եւ հետախուզական գործունեության ղեկավարը:
Արեւմուտքցի դիտորդների կարծիքով, այս ապստամբական միավորումը ունի մոտ ութ հազար մարտիկ եւ Սիրիայում համարվում է հնագույններից եւ առավել մարտունակներից մեկը:
Վերջին մեկ ամսում Սիրիայի կառավարական բանակը երկրի հյուսիսում մի շարք հաջող գործողություններ է իրականացրել ապստամբների դեմ: Զինվորականներին մասնավորապես հաջողվել է ապաշրջափակել Հալեպի օդանավակայանը, ինչպես նաեւ վերականգնել դեպի Հալեպ տանող մի քանի ճանապարհների հսկողությունը:
Ֆրանսպրեսը հաղորդում է, որ Հալեպում կորուստներ կրող ապստամբները վրեժխնդրության քայլ են ձեռնարկել Դամասկոսի մոտակայքում, որտեղ նոյեմբերի 17-ին ահաբեկչությունից զոհվել է 31 մարդ:Կառավարական շենքում տեղի ունեցած պայթյունի բոլոր զոհերը բանակի զինծառայողներ են, որոնց մեջ կա 4 գեներալ:
Syrian Observatory for Human Rights իրավապաշտպան կազմակերպությանը վկայակոչելովՙ BBC News հեռուստաալիքը հաղորդում է, որ պայթուցիկ սարքերը դրված են եղել կառավարական շենքի ներքնահարկում: Դա վկայում է, որ, չնայած շենքի պահպանությանը, պայթյունի կազմակերպիչներին հաջողվել է ներս թափանցել:
Ահաբեկչության պատասխանատվությունը ստանձնել է սիրիացի ապստամբների «Դամասկոսի վահան» կազմակերպությունը:
