«Վալլեքս» խմբի ընկերությունների տեղեկատվության եւ հասարակայնության հետ կապերի բաժին
2013 թ. նոյեմբերի 16-ին «Վալլեքս» խմբի ընկերությունների նախաձեռնությամբ կազմակերպվեց ծառատունկով ուղեկցվող հերթական բնապահպանական երիտասարդական միջոցառումը, որն այս անգամ կրում էր «Կանաչ սահման» խորագիրը: Մասնակցում էին ՀՀ առաջատար բուհերի ուսանողներ, Լոռու մարզի երիտասարդության ներկայացուցիչներ, Երկրապահ կամավորական միության անդամներ եւ այլ շահագրգիռ անձիքՙ ընդհանուր թվովՙ մոտ 140 մարդ:
Մինչ ծառատունկի իրականացման վայրՙ սահմանային զորամաս ժամանելըՙ միջոցառման մասնակիցներն այցելեցին զոհված հայ ոստիկան ազատամարտիկների հուշահամալիր Տավուշի մարզի Նոյեմբերյան քաղաքում, ծաղիկներ դրեցին հուշարձանին:
Այդուհետեւ մասնակիցներն այցելեցին սահմանային զորամաս, որտեղ նախ ծաղիկներ դրեցին ազատամարտիկ Վալերի Չիթչյանի հիշատակին կառուցված հուշարձանին, ապաՙ իրականացրեցին ծառատունկ զորամասի տարածքում:
Զորամասի տարածքը կանաչապատելու եւ երրորդ պաշտպանական գոտում անտառային լրացուցիչ պաշտպանիչ շերտ ստեղծելու նպատակով ծառատունկեր իրականացնելու համար «Մանես» բարեգործական հիմնադրամի միջոցներով ձեռք բերված ավելի քան 500 տնկի «Կանաչ սահման» միջոցառման շրջանակներում նվիրաբերվեց զորամասին: Պաշտպանական գոտում ծառատունկի նպատակը թշնամու գնդակների եւ մեր զինվորների միջեւ եւս մեկ պատնեշ ստեղծելն ու մեր սահմանները թշնամու համար առավել անառիկ դարձնելն է:
Ծառատունկից հետո հյուրերը շրջեցին զորանոցներում եւ ծանոթացան զինվորների կենցաղին, բանակային առօրյային, շարահրապարակում դիտեցին գնդի հետախուզական վաշտի ցուցադրական մարտական վարժություններ: Զորամասի ակումբում հյուրերի համար տրվեց համերգՙ զորամասի ժողովրդական գործիքների համույթի կատարմամբ, որի համար օգտագործվող ձայնային տեխնիկան նույնպես «Մանես» բարեգործական հիմնադրամի նվերն է զորամասին:
Միջոցառումն ավարտվեց զորամասի ճաշարանում ընթրիքով:
«Վալլեքս» խմբի ընկերությունների կորպորատիվ սոցիալական պատասխանատվության ծրագրերը կոորդինացնող ստորաբաժանումների ներկայացուցիչները պայմանավորվածություններ ձեռք բերեցին զորամասի հրամանատարության հետ այդօրինակ միջոցառումները շարունակական դարձնելու եւ ընդլայնելու վերաբերյալ:
