Հրաժարվողների փոխարեն ընդգրկել նրանց, ովքեր ցանկանում են, բայց տարիքի չհամապատասխանելու պատճառով չեն կարող
Կենսաթոշակային բարեփոխումների ծրագրի մշակումը սկսվել է 8-9 տարի առաջ, եւ այն նախատեսում է անցում ներկայիս բաշխողական համակարգից բազմաստիճան կուտակային համակարգի: Պարտադիր կուտակային համակարգը սկզբնապես նախատեսված էր, որ կգործի 2008-ից, բայց տարբեր պատճառներով անընդհատ հետաձգվեց, եւ այժմ որոշվել է, որ գործելու է 2014-ի հունվարի 1-ից: Այդ համակարգում կընդգրկվեն այդ պահին մինչեւ 40 տարեկան ՀՀ քաղաքացիները: Պարտադիր կուտակային համակարգով նրանք իրենց օրինական եկամտի 5 տոկոսը վճարում են ստեղծվող հիմնադրամներում, իսկ պետությունն էլ իր կողմից ավելացնում է նույն չափով գումար` ի հավելումն յուրաքանչյուրի ներդրած գումարի: Կուտակված գումարը, գնաճի տարեկան ցուցանիշները հաշվի առնելով, պարտադիր կուտակային համակարգում ընդգրկվածները պետք է ստանան որպես կենսաթոշակ` այդ տարիքին հասնելուց հետո:
Ակնհայտ է, որ նոր` պարտադիր կուտակային համակարգում ընդգրկվողները հայտնվում են շահեկան վիճակում, քանի որ, բացի իրենց ներդրած գումարից, պետությունը եւս ավելացնում է նրանց ապագա կենսաթոշակի գումարը: Այսինքն, փաստորեն, մյուս հարկատուների հաշվին, պետությունը լրացուցիչ ավելացնում է այս համակարգում ընդգրկվածների ապագա կենսաթոշակը: Ինչը, սակայն, չի արվում 40 տարեկանից բարձր անձանց համար, որոնք կցանկանան ընդգրկվել պարտադիր կուտակային համակարգում, բայց կարող են ընդգրկվել միայն կամավոր կուտակային համակարգում: Նրանց դեպքում պետությունն իր կողմից ոչինչ չի ավելացնում, եւ այդ մարդիկ թոշակի տարիքում ստանալու են միայն իրենց կուտակած գումարները: Այս դեպքում, անհասկանալի է, թե ո՞րն է պարտադիր կուտակային համակարգից դժգոհողների դժգոհության պատճառը, բացի, թերեւս, անվստահությունից 20-30 տարի հետո գործողության մեջ մտնող համակարգի նկատմամբ եւ սեփական աշխատավարձից 5 տոկոսը իր իսկ ապագա կենսաթոշակին ներդնել չցանկանալուց: Այլ խոսքով, բողոքողները գերադասում են «նաղդ» ստացվելիք գումարը` ապագայում այն ստանալու հնարավարությունից:
Թե ինչպե՞ս կվարվեն այս իրավիճակում կառավարությունը կամ ՀՀԿ պատգամավորներըՙ չգիտենք, բայց առաջարկում ենք բոլոր նրանց փոխարեն, ովքեր չեն ցանկանում ընդգրկվել պարտադիր կուտակային համակարգում, ընդգրկել նրանց, ովքեր այդ ցանկությունն ունեն, բայց տարիքային անհամապատասխանության պատճառով չեն կարող դա անել: Այդպես ավելի արդար կլինի թե առաջինների, թե երկրորդների համար: Հրաժարվողները չեն վճարի իրենց եկամտի 5 տոկոսը, ինչպես եւ ցանկանում են, իսկ երկրորդները` նաեւ իրենց ցանկությամբ կվճարեն եւ նույն չափով էլ պետությունը կավելացնի այդ գումարը նրանց ապագա կենսաթոշակի համար:
