ԱՊՍՏԱՄԲՆԵՐԻ ԸՆԴՀԱՆՈՒՐ ԶՈՐԱՀԱՎԱՔ ՀԱԼԵՊՈՒՄ
Իսլամիստները մի շարք պարտություններ են կրել
Սիրիացի ապստամբների շարքերում նախագահ Բաշար Ասադի վարչակարգի դեմ կռվող իսլամիստները զենք բռնելու ունակ բոլոր մահմեդականներին կոչ են արել միանալ իրենց: Ֆրանսպրես գործակալությունը հաղորդում է, որ իսլամիստները ծեր եւ տկար մահմեդականներին հորդորել են ապստամբությանն օժանդակել փողով ու զենքով:
Դավանակիցներին ուղղված այդ արտակարգ կոչը ստորագրել են վեց արմատական խմբավորումներ, այդ թվումՙ «Իրաքի եւ Լեւանտի իսլամական պետությունը» եւ «Ալ Նուսրա ճակատը»:
Իսլամիստները խոստովանել են, որ վերջին շաբաթներին իրենք Հալեպի շրջանում մի շարք ծանր պարտություններ են կրել կառավարական զորքերից: Նրանց խոսքերով, ապստամբների շարքերում նկատելի են «մեծ կորուստներ», իսկ հակառակորդը կարողացել է գրավել մի ամբողջ շարք ռազմավարական օբյեկտներ: Կառավարական ուժերը մասնավորապես վերականգնել են հսկողությունը Հալեպի օդանավակայանի վրա, որը չէր գործում մեկ տարուց ավելի: Դա սիրիական բանակին թույլ է տվել բարելավել զորքերի մատակարարումը երկրի հյուսիսում:
Բացի դրանից, կառավարական ուժերը գրավել են Աֆեյրա քաղաքը եւ այն Հալեպին միացնող խճուղու բոլոր բնակավայրերը: Դրա շնորհիվ ամրապնդվել են բանակի դիրքերը Հալեպից հարավ-արեւելք ընկած շրջանում:
Արդեն մեկ տարուց ավելի փոփոխական հաջողություններով ճակատամարտ է մղվում Հալեպի համար: Այդ ամբողջ ժամանակամիջոցում քաղաքը մնում է կիսված, քանի որ կողմերից ոչ մեկը ուժեր եւ միջոցներ չունի ամբողջ Հալեպը վերահսկելու համար:
Չորեքշաբթի հետմիջօրեին հայտնի դարձավ, որ կառավարական զորքերը հերթական հաղթանակն են տարելՙ Դամասկոսից հարավ հետ գրավելով ապստամբների հենակետ Հուջեյրի քաղաքը: Մայրաքաղաքի այդ արվարձանում կա շիաների մզկիթ, որը ներկայումս ռազմակայան է Իրաքից, Իրանից եւ Լիբանանից եկած ջիհադիստ գրոհայինների համար:
Բրիտանական «Սքայ նյուզ» հեռուստաալիքը ընդդիմության աղբյուրներ վկայակոչելով հաղորդում է, որ ավելի վաղՙ նոյեմբերի 13-ին, Դամասկոսի արվարձանում կառավարական բանակի տասնյակ զինվորներ էին սպանվել երկու ականված ավտոմեքենաների պայթյուններից:
