«Վալլեքս» խմբի ընկերությունների տեղեկատվության եւ հասարակայնության հետ կապերի բաժին
2013թ. նոյեմբերի 12-13-ին Ստեփանակերտի «Վալլեքս Գարդեն հոթելի» խորհրդակցությունների սրահում անցկացվեց «Տուրիզմը Ղարաբաղում» խորագրով համաժողով: Համաժողովը, որին մասնակցում էին Հայաստանի մոտ 50 առաջատար զբոսաշրջային ընկերությունների ղեկավարներ եւ այլ ներկայացուցիչներ, Ստեփանակերտում գործող երեք զբոսաշրջային կազմակերպությունների ղեկավարներ, ԼՂՀ կառավարությանն առընթեր զբոսաշրջային վարչության պետը, ԼՂՀ մշակույթի փոխնախարարը եւ այլ պաշտոնյաներ, կազմակերպվել էր «Վալլեքս» խմբի հյուրանոցային-զբոսաշրջային գործունեություն իրականացնող միավորների տնօրինության նախաձեռնությամբ:
Խորհրդաժողովում բացման խոսքով ներկաներին դիմեց «Վալլեքս Գարդեն Հոթելի» տնօրեն Միքայել Ղալումյանը, ով, ողջունելով միջոցառման մասնակիցներին, հույս հայտնեց, որ նման հանդիպումները կդառնան ավանդական եւ կնպաստեն Ղարաբաղը ակտիվ զբոսաշրջային ծրագրերում ընդգրկելուն:
Այնուհետեւ ելույթ ունեցան «Արիես Լիբեր», «Լեւոն թրավլ», «Սիդոն Թուր ընդ թրավլ», «Սիրով թրավլ», «Երեւան թրավլ», Ստեփանակերտի «Վարանդա թրավլ» ընկերությունների ներկայացուցիչները: Բանախոսները խոսեցին այն խնդիրների մասին, որոնք խոչընդոտում են ղարաբաղյան տուրիզմի զարգացմանը: Դա նախ եւ առաջ հեռավորությունն է Երեւանից եւ ոլորապտույտ ճանապարհների անբարեկարգ վիճակը, որը վանում է հատկապես արտասահմանյան զբոսաշրջիկին: Դրա լուծման ուղիներից մեկը կարող էր լինել փոքր ավիացիայի զարգացումը, ուղղաթիռային կանոնավոր թռիչքների կազմակերպումը: Խոչընդոտների թվում նշվեցին նաեւ արտերկրում Ղարաբաղի մասին ոչ լիարժեք տեղեկատվության առկայությունը եւ Ադրբեջանի կողմից իրականացվող հակաքարոզչությունը: Խոսվեց նաեւ այն մասին, որ Ղարաբաղում զբոսաշրջային պատշաճ մակարդակի ծառայություններ մատուցող ընկերությունները քիչ են, չկան ազգային խոհանոց առաջարկող ռեստորաններ եւ զբոսաշրջութան զարգացումը խթանող այլ բաղադրիչներ: Ոլորտի մասնագետներն այնուամենայնիվ նշեցին, որ այդ խնդիրները չպետք է արգելափակեն իրենց ջանքերը, եւ պատրաստակամություն հայտնեցին այսուհետեւ ավելի ակտիվ աշխատելու Ղարաբաղում: Բավարար քանակի հյուրանոցային տեղեր ապահովելու հարցում արդեն զգալիորեն բարելավվել է վիճակը. գործում է շուրջ 1000 հյուրանոցային տեղ: «Վալլեքս Գարդեն Հոթելի» բարձրակարգ հյուրանոցային պայմաններն արդեն հնարավորություն են տալիս վստահորեն Արցախ հրավիրել ամենախստապահանջ զբոսաշրջիկին:
ԼՂՀ տուրիզմի վարչության պետը, ամփոփելով խորհրդաժողովը, նշեց, որ վերջին տարիներին լուրջ փոփոխություններ են նկատվում ոլորտում, եւ կառավարությունը փորձում է աշխատանքներ իրականացնել ոլորտի զարգացումը խթանելու նպատակով: Սակայն նշված խնդիրների հաղթահարումը տեսնում է Հայաստանի զբոսաշրջային կազմակերպությունների ակտիվ գործունեությամբ, քանի որ, ըստ պաշտոնական վիճակագրական տվյալներիՙ տարեկան 15 000 զբոսաշրջիկի այցելության պայմաններում, ոչ մի մասնավոր ընկերություն լուրջ ներդումներ չի կարող կատարել ոլորտում:
Արցախում զբոսաշրջության զարգացման լուրջ ներուժ համարվեց Արցախում դեռեւս չեղած Հայաստանի բնակիչների մեծ թիվը: Առաջիկայում կմշակվեն ծրագրեր, որոնք նպատակ կունենան կարճատեւ ու մատչելի զբոսաշրջային փաթեթներ առաջարկելու Հայաստանի բնակիչներինՙ հնգօրյա հանգիստը Արցախում կազմակերպելու նպատակով: Քննարկվեց նաեւ որակյալ զբոսավարների պատրաստման խնդիրը: Նոյեմբերի 12-ին համաժողվի մասնակցիները եղան «Արցախ բրենդի քոմփանի» ընկերությունում, ծանոթացան ոգելից խմիչքների արտադրությանը եւ մասնակցեցին համտեսի:
