Հալեպի մոտ բանակը հետ է գրավել ռազմակայան
Ընդդիմադիր եւ հեղափոխական ուժերի գլխավոր կազմակերպությունըՙ Սիրիական ազգային կոալիցիան սկզբունքային որոշում է ընդունել մասնակցելու Սիրիայի հակամարտությանը նվիրված ժնեւյան կոնֆերանսին, որը պետք է անցկացվի մինչեւ տարեվերջ: Այդ մասին հաղորդում է Ռոյթեր գործակալությունը:
Կոալիցիայի ներսում ձեռք բերված պայմանավորվածության համաձայն, կոնֆերանսի մասնակիցները պետք է երաշխավորեն մարդասիրական օգնության մուտքը Սիրիա եւ երկրում քաղբանտարկյալների ազատ արձակումը: Ազգային կոալիցիայի հայտարարության մեջ նաեւ ասվում է, որ Ժնեւի կոնֆերանսի աշխատանքի արդյունքը պետք է դառնա Սիրիայի իշխանափոխությունը:
Կոալիցիայի հայտարարության մեջ նաեւ ասվում է, որ կազմակերպությունը լիազորված է Ժնեւի կոնֆերանսի հարցով բանակցելու Բաշար Ասադի վարչակարգի դեմ պայքարող ապստամբական խմբավորումների հետ:
Ավելի վաղ սիրիացի ընդդիմադիրների կոալիցիան սպառնացել էր չմասնակցել Ժնեւի կոնֆերանսին, եթե չնշվեն նախագահ Բաշար Ասադի պաշտոնաթողության կոնկրետ ժամկետներ, եւ եթե կոնֆերանսին մասնակցեն Իրանի ներկայացուցիչներ: Ռոյթեր գործակալությունը նշում է, որ ազգային կոալիցիայի նոր հայտարարության մեջ այդ նախապայմանները բացակայում են:
2012-ի նոյեմբերին ստեղծված Սիրիական ազգային կոալիցիան փորձում է միավորել Սիրիայի ընդդիմադիր ուժերին: Կոալիցիային չեն հարում մի շարք իսլամիստական խմբավորումներ, մասնավորապես «Ան Նուսրա ճակատը», որը առանձին երկրներում ճանաչված է որպես ահաբեկչական կազմակերպություն:
Սիրիայի հակամարտության խաղաղ կարգավորմանն ուղղված Ժնեւի կոնֆերանսի կազմակերպմամբ զբաղվում են ԱՄՆ-ը եւ Ռուսաստանը:
Ինչ վերաբերում է Սիրիայի ներքին անցուդարձին, կառավարական զորքերի ստորաբաժանումները նոյեմբերի 11-ին գրոհայիններից հետ են խլել Հալեպից ոչ հեռու գտնվող մի ռազմակայան: Այդ մասին հաղորդում է Ֆրանսպրես գործակալությունը` վկայակոչելով զինվորական աղբյուրներ:
Հալեպի միջազգային օդանավակայանի մոտակայքում գտնվող ռազմական օբյեկտի համար վերջին օրերին կատաղի մարտեր էին մղվում: Սիրիայի պետական հեռուստատեսությունն ընդգծում է, որ այդ ռազմակայանը տարածաշրջանի կարեւոր ռազմական կետերից է:
ՌԻԱ գործակալությունը հիշեցնում է, որ սիրիական զինված ընդդիմության գրոհայինները Հալեպի նահանգի հիշյալ ռազմակայան-ավիաբազան գրավել էին օգոստոսի սկզբներին:
